Olles Kulturráđđi finada maŋŋebárgga Kárášjogas. Ulbmiliin galledemiin lea oahppat eambbo sámi dáidda- ja kultursuorggi birra.
Maŋŋebárgga 24.9. lágidit vuos gulahallančoahkkima sámi dáiddárorganisašuvnnaiguin.
Kulturráđđi háliida gullat makkár dárbbut sámi dáiddáriin ja earát kultursurggiin leat ja makkár hástalusat leat iešguđet ge dáiddasuorggis. Kulturráđđi háliidivččii maid kulturpolitihkalaš oaiviliid mo ráđđi sáhttá čuovvolit Duohtavuođa- ja soabahankommišuvnna raportta. Dasa lassin áiggošii Kulturráđđi gullat mo ráđi doarjjaortnegiid heivehit buorebut sámi dáiddáriidda- ja kulturaktevrraide. Gulahallančoahkkin lea Scandic hoteallas maŋŋebárgga diibmu 16-18. Dán dieđiha Kulturráđđi preassadieđáhusas ja namuhit vel ahte vuosttaš geardde leat guokte sámegielat lahtu Kulturráđis oktanaga, namalassii Sigbjørn Skåden ja Siri Broch Johansen/Juho-Sire.
