-Almmuhus-
-Almmuhus-
OĐĐASATKulturráđđi juolludan ruđa Márkomennui

Kulturráđđi juolludan ruđa Márkomennui

-

-

Kulturráđđi lea juolludan 52,4 miljovnna ruvnno 114 musihkkafestiválii Norggas.

Norgga Kulturráđđi lea meannudan 172 musihkkafestivála ohcamuša mat leat miehtá Norgga, ja ohccon supmi lei sullii 136 miljovnna ruvnno.

96 festivála leat ožžon doarjaga Kulturráđis, ja 16 ohcci leat ožžon doarjaga moatti jahkái. Dasa lassin leat 18 festivála ožžon doarjaga musihkkalágideaddjeortnega bokte.

 

Hástaleaddji ja miellagiddevaš

Kulturráđđi áigu sihkkarastit máŋggaid beliid festiválain, ja ahte máŋggat musihkkašlájat ja hámit galget olahit eanet guldaleddjiide. Fágalávdegoddi lea vuoruhan festiválaid main leat našunála, regionála ja šlájalaš mearkkašumit, ja leat hui dárkilit geahčadan ahte seammasullasaš festiválat ožžot doarjagiid mat veahá sulastahttet eará festiválaid.

– Lea dehálaš danne go Kulturráđđi oažžu boahtte jagi árvvoštallanválddi «knutepunkt-ortnega» ovddas ja ferte oaidnit ollislaččat festiválasuorggi. Šaddá hástaleaddji ja miellagiddevaš bargun, ja oaivvildan Kulturráđis leat buoremus gealbu árvvoštallat dákkár surggiid, muitala Kulturráđi nubbijođiheaddji ja Musihkkalávdegotti lágideddjiid jođiheaddji, Arnfinn Bjerkestrand.

 

Oažžu 250 000 ruvnno

Okta festivála mii oažžu doarjaga lea Márkomeannu, go dan festiválii lea juolluduvvon 250 000 ruvnno. Nubbi sámi festivála mii maid lea ožžon kulturráđis 50 000 ruvdnosaš doarjaga lea Sami Music Week.

Festivála Finnmárkkus, mii eanemus doarjaga oažžu lea Várjjatfestivála, dat oažžu miljovnna ruvnno boahtte jagi ovddas. Eará festiválat vel Finnmárkkus, nu movt Aronnesrocken, mii oažžu 100 000 ruvnno ja Sørøyrocken 80 000 ruvnno.

 

Unnimus Finnmárkui

Go buohtastahttá Davvi-Norgga fylkkaid, de lea Nordlánda mii eanemus ruđa oažžu kulturráđis, go ollislaččat juolluduvvui 5 475 000 ruvnno festiválaide Nordlánddas. Romsii manná ges 3 080 000 ruvnno, ja Finnmárkui 1 230 000 ruvnno.

 

Máŋggat doalut eai oaččo

Leat máŋggat festiválat ja doalut maidda kulturráđđi ii leat juolludan ruhtadoarjagiid. Dá leat lágideaddjit Finnmárkkus geat ledje ohcan, ja geat eai ožžon doarjaga kulturráđis: Audioland, Bugøynesfestival, Samisk minifestival, Grenseløsfestival, Midnattsrocken, Perleporten, Barents Spektakel ja Samisk Musikkfestival.

-Almmuhus-