– Koronaroassu čuohcá garrasit kultursuorgái ja mii fertet analyseret dili ja gávnnahit makkár doaimmaid lea dárbu álggahit, lohká Kulturráđi direktevra Kristin Danielsen.
Njukčamánu 12. beaivvi ásahii ráđđehus olu doaimmaid bissehan dihtii koronavirusa leavvama. Earret eará gieldit lágidit kulturdoaluid ja dainna mearrádusain masse olusat kultursuorggis iežaset tinenvejolašvuođa.
– Buot museat, teáhterat ja festiválat leat giddejuvvon ja ii oktage artista dahje joavku sáhtte gosage mátkkoštit. Mo váikkuha dát kultursuorgái ja makkár doaimmat sáhttet veahkehit kultursuorggi dán dilis? Danin leat bálkáhan Menon Economics analiseregoahtit. Sii leat hárjánan árvvoštallat iešguđetlágan roasuid váikkuhusaid ja mus lea stuorra vuordámušat dán ovttasbargui, lohká Kulturráđi direktevra, Kristin Danielsen preassadieđáhusas.
– Earret mátkeealáhusa, de lea kulturealáhus okta daid ealáhusain masa koronaroassu lea eanemusat čuohcan, lohká Menon koronajoavkku jođiheaddji Leo A Grünfeld geas lea beroštupmi mo ovtta suorggi tienasmassin váikkuha olles ealáhussii.
Menon Economics lea servodatekonomalaš ja ealáhusekonoma guovddáš mii dutká ja analysere.
