Norgga kulturárbi fállá stipeandda skuvlaluohkaide, mánáidgárddiide, servviide ja joavkkuide jus servet čorgenakšuvdnii mas lea ulbmil čorget kuturmuittuid iežaset lagasbirrasis. Buoremus prošeakta oažžu bálkkašumi lassin 4000 ruvdnosaš stipendii.
Norgga kulturárbi fállá stipeandda skuvlaluohkaide, mánáidgárddiide, servviide ja joavkkuide jus servet čorgenakšuvdnii mas lea ulbmil čorget kuturmuittuid iežaset lagasbirrasis. Buoremus prošeakta oažžu bálkkašumi lassin 4000 ruvdnosaš stipendii.
Norgga kulturárbi bidjá fas johtui «Rydd et kulturminne» dahje «Čorge kulturmuittu» akšuvnna.
Sparebankstiftelsen DNB lea juolludan 800 000 ruvnno akšuvdnii.
– Sparebankstiftelsen lea oktiibuot addán badjel 5.4 miljovnna ruvnno dán čorgenakšuvdnii 2004 rájes. Mii illudit sakka dan doarjaga ovddas maid oažžut, mii dahká vejolažžan čađahit daid akšuvnnaid, lohká prošeaktaovddasvástideaddji Randi Skogum Norgga Kulturárbbis preassadieđáhusas.
Prošeakta mii heive sin ulbmiljovkui
Maiddái Sparebankstiftelsen DNB leat duhtavaččat prošeavttain man leat dorjon máŋga jagi.
– Mii doarjut prošeavttaid mat dorjot kulturárbbi várjaleami ja go min ulbmiljoavku vel leat mánát ja nuorat, de lea «Čorge kulturmuittu» prošeakta hui vuogas prošeakta, lohká Birthe M.Selvaag.
Eurohpá kulturmuitojahki 2018
Norgga kulturárbi háliida Eurohpá kulturmuitojagi oktavuođas erenoamážit bidjat fokusa mearragáddekultuvrii, sámi historjái, bargiidkultuvrii ja guolástanbearrašiidda.
Sii sávvet goitge ahte bohtet maiddái ohcamat sis geat háliidit čorget bálgáid, galbbaid cegget ja diekkár bargguid maid ferte dábálaččat bargat.
«Čorge kulturmuittu 2017/18»
Akšuvdna lea meinejuvvon vuollel 18-jahkásaš mánáide ja nuoraide ja galgá ovttastahttit praktihkalaš barggu kulturárbbiin lagasbirrasis.
Dá lea logát akšuvdna masa sihke skuvllat, joavkkut ja searvvit servet čorget, galbbaid cegget ja gáhttet kulturmuittuid dahje kulturbirrasiid iežaset lagasbirrasis.
Dán barggu ovddas oažžu joavku 4000 ruvdnosaš stipeandda, dasa lassin go addo bálkkašupmi buoremus prošeavttaide.
Kultureatnamiid aktiiva hálddašeaddjit
Ovddit akšuvnnat leat lihkostuvvan hirbmat bures. Olu prošeaktajoavkkut leat joatkán kulturmuitobargguin ja leat álgán jahkásaččat čohkket lagasbirrasa čorgemii.
Raporttat čájehit stuora áŋgiruššama ja olu miellagiddevaš vásáhusaid sihke rávisolbmuin ja mánáin.
Akšuvdna addá maid erenoamáš vejolašvuođa ovttasbargat earret eará historjájoavkkuiguin geat sáhttet buktit divrras máhtu prošeavttaide.
Olgodoaimmat távvaloahpahusa sadjái
Akšuvdnaoasálastin lea maid olu eanet go gáhttet kulturmuittuid, go dán barggu čađa ožžot mánát ja nuorat persovnnalaš oktavuođa iežaset lagasbirrasa historjái ja šaddet dainna lágiin aktiiva hálddašeaddjit kultureatnamiidda.
Távvaloahpahus lea lonuhuvvon olgodoaimmaiguin ja mánát ohppet aktiiva oasálastimiin.
