Eai goassege leat nu uhcán olbmot duššan johtolas go 2021:s. 87 olbmo dušše johtolagas, mii lea guhtta uhcit go jagi ovdal ja lea nubbi jahki vuollel 100. Ođđajagemánu vuosttaš beaivvi rájes lohkagoahtit fas lihkohisvuođaid ođđasit. Mii fertet geahččalit olahit johtolaga ulbmila, ahte ii oktage dušša dahje roasmmehuva, čállá Stáhta geaidnodirektevra Ingrid Dahl Hovland kronihkas.
Go hállat johtolatsihkarvuođa birra, de galgat mii eanemusat hállat dan birra mainna eat lihkostuvvan. Ovtta duššan olbmui logu duohken leat logut. Leat olu roasmmehuvvan olbmot, sin bearrašat ja skihpárat.
Jus geahčastat mo dilli lei duhátjagemolsumis, de dušše 341 olbmo johtolagas. Logi jagi dássái dušše birrasii 200. 1970:s ledje jápminlogut guđa geardde eambbo go dál. Dan rájes lea biillaid lohku lassánan ja leat golmma geardde eanet vuddjon kilomehterat. 87 jápmán olbmo ii galgga leat makkárge vuoiŋŋastanguoddá, lea ain roassu dego njoazes filmmas. Muhto lohku 87 duođašta ahte nulla duššan ja roasmmehuvvan olbmo lea vejolaš olahit.
Stáhtus 2021
2021 logut muitalit ahte eai lean nu galle heakkaváralaš ovddalboahtinlihkohisvuođat ja badjel geainnu lihkohisvuođat. Duššan olbmuid lohku geahpeduvvui beliin, 14 olbmos čieža olbmui, mii lea eanemusat njiedjan 2021:s. Duššan sihkkelastiid lohku njiejai viđas golbmii. 15 MC-vuoddji dušše, mii lea njeallje uhcit go 2020:s, muhto mearkkaša ahte juohke guđát olmmoš lei mohtorsihkkelvuoddji. MC-vuoddjis lea hirbmat stuorra lihkohisvuođariska. Diimmá logut muitalit ahte eai duššan nu olu ahkelogus 45-54 ja badjel 75 jagi.
Gávpotjohtolat ferte šaddat dorvvolabbon
Mii háliidat ahte eanet olbmot galget vázzit ja sihkkelastit gávpogiin. 22 proseantta min mátkkiin lea vácci ja dan fertet mii várjalit. Lea dehálaš gávpogii ja dearvvašvuhtii. Ii oktage vuollel 14-jahkásaš duššan 2019:s. Dađi bahábut dušše golbma vuollel 14-jahkásaš máná johtolagas 2021:s. Ledje 8-jahkásaš vázzi mánná, 14-jahkásaš sihkkelasti ja 10-jahkásaš mielčuovvu mánná biillas. Muhto geahppánan biilalihkohisvuođaid lohku ii leat nu čielggas vázzi ja sihkkelasti olbmuide ja dát lea stuorra hástalus.
Soahpamuš ahte don maid válddát ovddasvástádusa
Juohke johtolaga geavaheaddjiis leat iežas hástalusat. Nulla duššan ja roasmmehuvvan johtaleaddji áigumuš gáibida olu sihke stáhtas ja gielddas áimmahuššat geainnuid. Juohke johtaleaddji ferte bargat maid ieš sáhttá. Ovdamearkka dihtii: MC-vuoddjis lea stuorát lihkohisvuođariska go biilavuoddjis. Leat olu čilgehusat, muhto alla leaktu lea okta dain. Oaivvis vuodjit lea lassánan, iige geahppánan. Darvvihit biilaboahkána ii gáibit olu návccaid. Eanemus duššan olbmot eai leat geavahan biilaboahkána.
Álbmotlihttu
Norggas leamaš dat riika gos leamaš unnimus johtolatlihkohisvuođat Eurohpás olmmošlogu ektui. Eat mis leat buot ođđasamos vuojánat, eai ge buot buoremus geainnut. Muhto Norggas leat olusat geat ovttasráđiid juhket gelbbolašvuođa ja ovddidit buori johtolatláhttema. Johtolatsihkarvuohta lea álbmotlihkadus gosa buohkat čáhket.
