Duolva hoteallalatnja sáhttá leat sivvan go Finn Hågen Krogh fertii disdaga heaitit čuoigamis čuoigangilvvus Tour de Ski.
– Mus ii leat áibbas buorre foarbma, in ge vuoiŋŋa ollislaččat nu go galggašin. Dalle lea lossat čuoigat. Čuoigan lea lossa valáštallan, ja go ii leat buorre vuoigŋan, de šaddá vel losibun. Mun in stirddo ge. Eai leat doarvái fámut rupmašis, lohká Finn Hågen Krogh.
Krogh lohká ahte sus ii leat golgodávda.
– Ferte leat juoga man mun in gierdda ja masa lean reageren. Go ollejin Val Müstairii, de šattai lossadin vuoigŋat. Mun lonuhin lanja, ja buorránii jođánit. Go dovdo rattis, de mannet máŋga beaivvi ovdal go lean áibbas dearvvaš fas. Jus ii leat áibbas dearvvaš, erenoamážit gaskačuoigamiin, de lea lossat bissut njunnošis, lohká Krogh gii šattai goalmmádin vuosttaš čuoigamis.
– Orru manname bures oanehet gaskkaid čuoigat, lohká son.
Maid dagat dál?
– Lahti čuoigan ja Skandinavia cup leat beare árrat go leat boahtte vahkkoloahpa, ja juste dál in dieđe sihkkarit maid dagan. Dál manan sihkkarit ruoktot, fiidnát hárjehallat, lohká son.
Lea go ovdal dáhpáhuvvan ahte lea allergiija bissehan du?
– Lea dáhpáhuvvan Tour de Ski ovdal OG-gilvvuid. Dalle fertejin maid guođđit gilvvuid. Dalle gullájin ihkku muhrun hoteallas Oberhofas go šattai lossadin vuoigŋat, ja fertejin riŋget doaktárii, muitala Krogh.
Lea go gavjj masa reageret?
– Sáhttet leat máŋga diŋgga. Mun reageren guolgaelliide ja ollu eará diŋggaide. Sáhttá okta guolga doarvái mii dahká ahte foarbma hedjona. Lea váttis árvvoštallat.
Ledjet soaitit leat njunušjoavkkus gilvvu loahpaheamis. Movt dat orru?
– Lea dieđusge hirbmat ahkit. Ledjen sávvan gilvalit njunnošis gilvvuin, muhto nu dat lea. Lea hui ahkit, muhto lea goit Máilmmimeasttirčuoigan masa sáhtán hárjehallat. (©NTB)
