-Almmuhus-
OĐĐASATKripos sihtá muitalit rohcošemiid birra

Kripos sihtá muitalit rohcošemiid birra

-

-

Borgemánu 29. beaivvis gitta čakčamánu 9. beaivvi rádjái ávžžuha Kripos sosiála mediaid bokte mánáid muitalit rohcošemiid birra maid sii dahje sin olbmát vásihit. Namma kampánjjas lea «Eai buot čiegusvuođat galgga leat čiegusvuohtan».

Juohke beaivi dáhpáhuvvet rohcošeamit mánáid vuostá Norggas. Ollu rohcošeamit eai goassege boađe albmosii. Rohcošeaddji neavvun, áitta ja veahkaválddálaš láhttenvuohki oažžu máná doalahit čiegusvuođa. Nu sáhttá maid sivalašvuohta, heahpatvuohta dahje ballu mii dáhpahuvvá alccesis dahje rohcošeddjiin hehttet.

 

Báhcet čiegusvuohtan

– Mii oaidnit ahte ollugat, erenoamážit gaskal 10- ja 14-jahkásaš agis, muitalit rohcošeami birra muhtin olbmái, muhto rohcošeapmi báhcá čiegusvuohtan sin gaskkas. Dehálaš diehtu sidjiide lea ahte rávisolbmot galggaše maid oažžut diehtit rohcošeami birra, go dakkár čiegusvuođaid eai galgga doallat, muitala Kriposa hoavda Ketil Haukaas politiet.no siiddus.

 

Áibbas ođđa raporttas lea Kripos geahččan 107 duomu main leat rohcošeamit mánáid vuostá geat leat vuollel 14-jahkásaččat. Duomuin ledje 132 máná gillájeaddjin. Raporttas leat dutkamat, ja Kriposa dutkiid jearahallamat.

 

«Eai buot čiegusvuođat galgga leat čiegusvuohtan»

Borgemánu 29. beaivvis gitta čakčamánu 9.beaivvi rádjái ávžžuha Kripos sosiála mediaid bokte mánáid muitalit rohcošemiid birra maid sii dahje sin olbmát vásihit. Namma kampánjjas lea «Eai buot čiegusvuođat galgga leat čiegusvuohtan».

– Mii sávvat erenoamážit olahit gaskal 10- ja 14-jahkásaš mánáid, muhto maiddái rávisolbmuid olahit geat leat mánáid birrasiin. Min mihttu lea ahte rohcošeamit galget bissehuvvot nu jođánit go vejolaš ja veahkehit mánáid nu jođánit go vejolaš, dieđiha Kripos politiija neahttasiiddus.

Kriposa Facebook siiddus sáhtát geahččat kampánjja filmmaid ja gávdnat eanet dieđuid.

 

Olles servvodat dárbbaša eanet dieđu

Politiija háliida dieđuid bokte šaddat čeahpibun čoavdit dákkár áššiid mat gusket rohcošemiide mánáid vuostá.

– Mii jáhkkit maid ahte olles servvodat dárbbaša eanet dieđuid movt galgá ášši gieđahallat mas mánná vásiha rohcošeami. Sávvat ahte raporta ja kampánja lea ávkin, dieđiha Kripos.

 

Raportta váldooasit:

– Stuora oassi mánáin leat vásihan roavváseamos gutnehuhttima, nu go penetrerema. 12 proseantta dáin áššiin lea rohcošeapmi filbmejuvvon dahje govvejuvvon.

– 20 proseantta rohcošemiin dáhpáhuvve guhkit go golbma jagi.

– Ollu áššiin main gillájeaddji ieš muitalii rohcošeami birra, de eai mannan dieđut viidáset nu jođánit. Dieđut sáhtte maid gaskaomiid čađa mannat ja ádjánit. Politiijaide ja eará almmolaš ásahusaide almmustahttojedje unnán áššit.

– Gillájeaddjit geat leat vásihan rohcošeami go leat gaskal 5- ja 9-jahkásaččat, muitalit vuosttažettiin rohcošeami birra váhnemiidda. Sii geat leat gaskal 10- ja 14-jahkásaččat muitalit rohcošeami birra olbmái.

– Stuorimus oassi rohcošeddjiin leat nuoramusat. Badjel bealli dubmejuvvon rohcošeddjiin ledje gaskal 15- ja 24-jahkásaččat go rohcošeamit álge.

 

 

-Almmuhus-