Odne almmuhit iskkadeami bohtosiid álbmoga vuorjašumiid birra koronapandemiija vuolde.
– Ballat eanemus ekonomalaš niedjamis Norggas. Ballat maid massimis muhtima geasa leat buorit ja ahte eat beasa čájehit ovdamorraša daidda geat dárbbašit dan. Unnánepmosit ballat buohccámis dahje massimis barggu, lohká Thoresen iskkadeami bohtosiid birra.
Jearahallan skoviiguin
1041 olbmo, geat leat gaskal 18- ja 89-jahkásaččat vástidedje jearahallanskovi miessemánus, mii odne almmuhuvvo Našunála veahkaválddálašvuođa ja traumahtalaš huša máhttoguovddážis.
– Pandemiija lea čuohcan eallimiiddamet máŋgga ládje. Áigguimet iskat mo pandemiija čuohcá Norgga álbmogii servodagas mii lei jođus rahppot fas, oaidnin dihte leat go joavkkut main lei lossadet dilli go earáin pandemiija áigge, lohká Thoresen.
58 proseantta vástidedje ahte ballet ekonomalaš niedjamis Norggas, 47 proseantta vástidedje ahte ballet ahte ođđasit leavvá njoammun. 30 proseantta vástidedje ahte ballet čálgoservodaga billahuvvamis.
Ledje maid oallugat geat balle lagamusaideaset dihte, sihke ahte eai beasa galledit lagas olbmuid geat dárbbašit dan (44 %), massit muhtima geasa leat buorit (39 %). Oallugat maid balle iežaset dihte, nu go buohccát virusdávddain (23 %), eai oaččo dárbbašlaš divššu (19 %) ja šaddat bargguheapmin (13 %).
