Norggas leat registreren 366 ođđa koronanjoammuma ja dát lea masá beali unnit go vahkku áigi.
Vuossárgga čuovganeapmái registrerejedje 366 ođđa koronabuohcci Norggas. Dát lea 340 unnit koronanjoammuma go čieža beaivvi áigi.
Maŋimuš vahkku leat registreren oktiibuot 3889 ođđa koronanjoammuma, ja dat mearkkaša ahte koronavirus lea njommon gaskamearálaččat 555 olbmui jándoris. Ovddit vahkkus njoamui koronavirus gaskamearalaččat 706 olbmui beaivái.
Oaivegávpogis gos eanemus olbmot buhcet koronavirusiin registrerejedje 88 ođđa njoammuma mannan jándora, ja dat leat 18 unnit go vahkku áigi. Oslos lea guokte maŋimuš vahkku duođaštuvvon koronavirus gaskamearalaččat 199 olbmos juohke beaivvi.
Badjel miljovnna olbmo boahkuhuvvon
Dássážii leat Norggas čađahan 4,9 miljovnna koronaiskosa. Dáid searvvis leat duođaštan koronavirusa 107 510 olbmos, čájehit njoammudávddaid nationála dieđihanvuogádaga gaskaboddosaš logut.
Boahkuheapmi maid ovdána Norggas. Oktiibuot leat 1 025 429 olbmo ožžon koronaboahku vuosttaš dosa, ja guokte dosa leat addán 299 631 olbmuid.
Norgga buohcceviesuin ledje 209 koronabuohcci sotnabeaivvi, ovddit beaivvi ektui ledje logut njiedjan 11 pasieanttain.
Dássážii leat 708 olbmo jápmán koronavirusii. 61,3 proseantta dáin ledje badjel 80 jagi boarrásat. Norggas leat 16 olbmo vuollel 50 jagi jápmán koronavirusii.
(©NTB)
