Gávpotráđđi joatká ain garra doaibmabijuiguin Oslos vel guokte vahkku, muhto dahket muhtun geahpádusaid mánáide ja nuoraide.
Mánu maŋŋá ruovttuoahpahusa joatkka- ja nuoraidskuvllas galget oahppit fas ruovttoluotta skuvllaide, vuossárgga cuoŋománu 19. beaivvi rájes.
Reasta Oslo-álbmogii eai leat geahpádusat. Gávpotráđi jođiheaddji Raymond Johansen (Bb) dadjá ahte ráđiid dihtii maid leat ožžon Dearvvašvuođadirektoráhtas ja Álbmotdearvvašvuođainstituhtas, ii leat dohkálaš rahpat Oslo dál.
Dat mearkkaša ahte priváhta ruovttuin doalahuvvo gielddus mas eai oaččo leat badjel 2 guossi, muhto doaibmabidju galgá árvvoštallot boahtte vahkku fas.
