– Dálá koronadoaibmabijut doalahuvvojiti ođđajagemánu nuppi oassá, go ballat ahte njoammun lassána juovllaid áigge, dadjá dearvvašvuođaministtar Bent Høie (O).
Ráđđehusa preassakonferánssas, mii lei maŋŋebárgga, čájehii Høie ahte juovlabasiid oktavuođas leat olusat geat mátkkoštit gielddaid gaskka, olgoriikii ja ruovttoluotta ja olusat čoahkkanit. Høie dajai ahte dat sáhttá dagahit ahte njoammun lassána.
– Danin doalahit nationála doaibmabijuid ođđajagemánu nuppi oassái. Dalle áigut ođđasit árvvoštallat, dadjá Bent Høie.
Son maid váruha olbmuid geain leat dávdamearkkat, muhto eai iskkat go eai háliit ávvudit juovllaid erremis.
– Dan ii galgga dahkat. Dat sáhttá mearkkašit ahte váldá riskka ja njoammuda lagamusaid juovlaávvudeamis, dadjá Høie.
