Siviilaáittardeaddji lea iskan mo covid-19 lea váikkuhan sin dili geat čohkkájit Norgga giddagasain, vuosttaš áiggi go virus leavvagođii.
Raporta čájeha ahte leat biddjon máŋga dehálaš doaimma johtui suddjen dihte sin geat čohkkájit giddagasas ja buhtadan dihte gáržžidemiid mat bohtet pandemiijagieđahallama dihte. Seammás boahtá ovdan ahte njoammuneastadandoaimmat, nu go erren, leat biddjon vaikko rihkku olmmošrievttálaš standárddaid ja dearvvašvuođafágalaš ráđiid.
Earenoamáš rašit
Sii geat čohkkájit giddagasas leat earenoamáš rašit pandemiijadilis, go sis lea ráddjejuvvon vejolašvuohta suodjalit iežaset njoammuma vuostá, seammás go sis leat obbalaččat eambbo buozalmasvuođat go álbmogis muđui. Iskkadeamis, mii lea huksejuvvon dieđuid vuođul gaskal njukčamánu 12. beaivvi ja miessemánu 14. beaivvi, leat guovddáš eiseválddiid, giddagasaid jođiheddjiid, giddagasaid dearvvašvuođabálvalusaid dieđuid, ja olbmuid jearahallaniskkadeapmi geat čohkkájit giddagasas.
– Ulbmil dáinna iskkademiin lea leamaš váikkuhit oahppama ja unnidit olmmošvuoigatvuođaidrihkkunvára jus njoammudávda ođđasit leavvagoahtá. Min mihttu lea ahte raporta sáhttá geavahuvvot oassin boahtteáigásaš doaimmaid árvvoštallamis ja plánemis, lohká siviilaáittardeaddji Hanne Harlem.
Maŋŋel go dávda leavvagođii, de bijai kriminálafuolaheaddji olu doaimmaid doalahan dihte fysalaš gaskka ja vuhtii váldin dihte ráinnasvuođa. Dat doaimmat leat leamaš dehálaččat eastadit dávdda njoammuma giddagasain.
– Mii leat oaidnán olu ovdamearkkaid dasa ahte giddagasat leat garrasit rahčan doalahan dihte doaibmafálaldagaid sidjiide geat čohkkájit giddagasas. Seammás oaidnit ahte áigodat lea čuohcan oallugiidda go eai leat beassat deaivvadit bearrašiin ja go leat mannan guhkit áigodaga čađa seallas, lohká siviilaáittardeaddji, Hanne Harlem.
