Boahtte vahkku galggai stuora riikkaidgaskasaš biebmokongreassa lágiduvvot Guovdageainnus mii čohkke eamiálbmogiid miehtá máilmmi. Muhto nu ii šatta dál go ávžžuhuvvo koronadávdda dihte heaittihit stuora lágidemiid.
Guovdageainnu sátnejođiheaddji Hans Isak Olsen muitala bearjadaga maŋŋelgaskabeaivvi ahte lea ovttaoaivilvuohta šluhttet Árktalaš álgoálbmogiid Biebmokongreassa lágideami mii livčče álgit boahtte vahkku mánnodaga Guovdageainnus, ja bisttán olles vahkku.
Lea Álbmotdearvvašvuođa Instituhta ráva maid Internasjonála boazodoalloguovddáš mii lágida doaluid, lea váldán vuhtii dan dihte go lea sáhka doaluin mii čohkke ollu olbmuid geat bohtet iešguđet sajiin miehtá máilmmi. Ávžžuhus lea ge šluhttet lágideami, ja dan leat dál mearridan čuovvut.
– Mii váldit duođasin dan dili mii lea čuožžilan miehtá máilmmi. Suohkan livčče okto sáhttán bissehit dán ja ii oro riekta dahkat. Lei oktasaš ipmárdus ovttas lágideddjiin ja suohkandoavttirjođihemiin čađahit dán, lohká sátnejođiheaddji Olsen.
Ávvir čálii bearjadaga ášši mas lágideaddjit ja suohkandoavttir hilgo šluhttet doaluid lágideamis.
Dál lea ođđa diehtu áššis šluhttet doaluid.
Unnan kapasitehta suohkanis
Suohkanis váilot guokte doaktára odne, ja eai leat ožžon turnusdoaktára ja ii leat kapasitehta.
– Lagabut 200 guossi livčče boahtán deike miehtá máilmmi ja livčče várra šaddan min ovddasvástádus sin dikšut gitta dearvvašmuvvet. Go ožžot dan dávdda, de eai livčče beassat šat girdit ja johttit, eai ge livčče beassan ruoktot vuolgit, lohká Olsen Ávvirii.
Geavahan olu resurssaid
Bearjadaga beaivet lei čoahkkin mas Guovdageainnu váldosuohkandoavttir Tuija Niiranen, Riikkaidgaskasaš boazodoalloguovddáža direktevra Anders Oskal ja Guovdageainnu suohkana sátnejođiheaddji Hans Isak Olsen mearridedje šluhttet dan lágideami mii livčče čohkken 200 riikkaidgaskasaš guossi Guovdageidnui.
– Livčče máilmmi buorre dáhpáhus eamiálbmogiid ektui ja erenoamážiid Guovdageidnui jus livčče lágiduvvon. Ii leat daddjon ahte ii šatta lágiduvvot eará háve, muhto lea dál go dilli lea ná. Dasa leat biddjon ollu resurssat ja sihkkarit ollu ruhta oažžut dan čađahuvvot, lohká sátnejođiheaddji gii ii sáhte estimeret ge dan ekonomalaš váikkuhusa dan dáfus.
Lágideaddji lea bargame dál dieđihit olbmuide geat leat pláneme Guovdageidnui boahtit, ja addit dieđu ahte sii eai lágit dáid stuora doaluid.
