-Almmuhus-
-Almmuhus-
OĐĐASAT Korona soalddáhiin geat leat ruovttus beassážiid

Korona soalddáhiin geat leat ruovttus beassážiid

-

-

Lávvordaga duođaštuvvui ahte 14 soalddáhii, geat leat ruovttuin beassášluomus, lea njommon covid-19.

Oktiibuot 16 soalddáhis Setermoen militearabáikkis Sis-Romssas lea duođaštuvvon korona,  čállá Nordlys aviisa. Guovttes sudnos leaba militearabáikkis. Earát leat mannan beassášlupmui iešguđet suohkanii.

Máŋgga suohkanis

Nordlys aviisii duođašta Hæren ovddasteaddji Eirik Skomedal ahte covid-19 lea duođaštuvvon 14 soalddáhis geat leat mannan ruoktot beassážiidda, ja guoktásis geat leaba leairras.

–Sin lagas oktavuođat leat máŋgga suohkanis, ja buohkat leat ožžon dieđu. Eat dieđe gos njoammun lea vuolgán, dadjá Skomedal.

Dat guovttis geat leaba militearabáikkis, leaba seamma kohortas ja biddjon isolašuvdnii. Sudno lagasoktavuođat leat biddjon erremii, čállá NTB.

Jáhkehahtti ahte lea njommon doppe

Skomedal ii loga sin diehtit leago dan 14 soalddáhii njommon virus ovdal go sii vulge beassášlupmui, vai leago dávda njommon sidjiide eará báikkis. Muhtin soalddáhiin lea leamaš friddja ovdalaš beassážiid ja muhtimiin fas beassážiid.

–Lea váttis dadjat, muhto lea jáhkehahtti ahte muhtimiidda lea njommon Setermoenis ovdal go manne permišuvdnii. Eat leat vel geargan njoammunguorramiin, danne eat dieđe gos njoammun boahtá. Setermoenis ii leat duođaštuvvon njoammun njealji vahkkui, dadjá son Nordlys aviisii.

Ráddjejit lihkadeami

– Go soalddáhat máhccet leirii maŋŋel beassášluomu, de ráddjet oktasašlanjaid geavaheami. Soalddáhat eai beasa olggos mannat dan lagamus áiggis go leat boahtán ruovttoluotta, dadjá Skomedal NTB:i.

-Almmuhus-