Finnmárkku buohcciviesuin lea ain oba buorre dilli. – Ii mis leat oktage korona-njoammudávdda buohcci dál buohcciviesus.
Finnmárkku buohcciviesu gulahallanhoavda, Eirik Palm, dieđiha preassadieđáhusas duorastaga, njukčamánu 27. beaivvi, ahte buot Finnmárkku buohcciviesu ossodagain lea buorre sadji váldit vuostá korona-njoammudávdda buhcciid geat dárbbašit buohcciviesu divššu ja vuoigŋanmašiinna, ja leat bures ráhkkanan dasa.
– Ii mis leat oktage korona-njoammudávdda buohcci dál buohcciviesus. Ledje guokte mannan vahkoloahpa ja soai leaba dearvvasmuvvan ja beassan ruoktot. Dan masa mii leat eanemus vuorjašuvvan, lea ahte sáhttet šaddat uhcán bargit. Lea hui illudahtti go ievttá rájes leat golmmas dieđihan ahte sii sáhttet bargat ja dál lea lohku juo 117 olbmo, čilge Finnmárkku buohcciviesu gulahallanhoavda, Eirik Palm.
Rievdadusat buohcciviesus ievttá rájes
Finnmárkku buohcciviesus ledje mannan maŋŋebárgga 44 bargi errenáiggis. Ikte, duorastaga, ledje 38 bargi.
– Dál eai leat eambbo go 31 bargi geat leat errenáiggis dearvvašvuođa eiseválddiid rávvagiid ektui, lohká Eirik Palm.
Duođaštuvvon njommon
Finnmárkku buohcciviesu gulahallanhoavda, Eirik Palm, muitala ahte oktii Finnmárkku buohcciviesu bargoveagas lea duođaštuvvon njommon Covid-19 virus, muhto son ii leat buohccivissui biddjon.
– Dát olmmoš ii leat leamaš buohccidivššus, eat ge bala son njoammuda earáid, čilge Eirik Palm ja lohká ii sáhte muitalit guđemuš báikki buohcciviesu ossodagas son barggai.
Palm čilge ahte lea iešguđet gielddaid dearvvašvuođabálvalusat mat váldet iskosa olbmuin, mat mearridit geat dárbbašit eambbo divššu ja mat dihtet gallásii lea njoammudávda njommon.
– Mii váldit dušše vuostá buohcciid geat dárbbašit divššu, joatká Eirik Palm.
Dávddat eai váldde luomu
Finnmárkku buohcciviesu gulahallanhoavda, Eirik Palm, deattuha ahte buohccit, geat leat ožžon dikšuntiimmu doaktára luhtte, eai dárbbaš ballat ahte buohcciviesus njoammu sidjiide dávda.
– Eará buohccit eai dárbbaš ballat ahte Covid-19 njoammu sidjiide buohcciviesus go sis lea dikšuntiibmu. Mis lea čavges njoammusuodjalanvuogádat dáppe, nu ahte buohcci sáhttá leat áibbas oadjebas ahte sutnje ii njoamo Covid-19 njoammudávda, deattuha Eirik Palm ja lasiha:
– Min bargit fuolahit ahte buohkat, geat besset buohccivissui, ožžot buot buoremus divššu.
Dikšumat maŋiduvvojit
Finnmárkku buohcciviesu gulahallanhoavda, Eirik Palm, lohká korona njoammudávdda dihtii lea Finnmárkku buohcciviessu maŋidan buot dikšumiid mat sáhttet vuordit.
– Finnmárkku buohcciviessu lea dán rádjái registereren 1976 heaittihuvvon dahje maŋiduvvon dikšuma ja konsultašuvnna njukčamánus. Dát guoská sihke somatihka dahje rupmaša (eanaš poliklinihka), čuohpademiid ja psykiatriija, muitala Finnmárkku buohcciviesu gulahallanhoavda, Eirik Palm.
Fiskes gearggusvuođadássi
Finnmárkku buohcciviesus lea dál fiskes gearggusvuođadássi buot buohcciviesuin ja diksunbáikkiin miehtá Finnmárkku guovllu. Dát dássi mearkkaša ahte dilli ii leat vuos nu čielggas, muhto sáhttá šaddat dárbu liigenávccaide. Sáhttá maid šaddat duođalit dilli ja lea eahpesihkar ahte leat doarvái návccat ja soaitá leat dárbu liigedoibmii. Buohcciviessu lea juo ráhkkanan dáid dásiid dustet.
Finnmárkku buohccivissui ii beasa go váldouvssa bokte. Dušše riegádahtti nissona guoibmi ja mánáid ja duođalaš buohcci lagamuččat besset fitnat buohcciviesus.
