-Almmuhus-
-Almmuhus-
-Almmuhus-
CORONAVIRUSKorona leavvan máŋgga guovllus: – Mii leat gidden fuolahus­guovddáža

Korona leavvan máŋgga guovllus: – Mii leat gidden fuolahus­guovddáža

-

-

Koronadávda lea daid maŋemus beivviid leavvan máŋgga guovllus Romssas ja Finnmárkkus. Guovdageainnus leat šaddan giddet fuolahusguovddáža.  Dán áššis logat movt dilli lea iešguđetge suohkaniin. 

Guovdageainnu suohkanis lea njealji olbmos duođaštuvvon koronadávda daid maŋemus beivviid. Okta sis lea  bargi Guovdageainnu Dorvogoađi fuolahusguovddážis. Bargi leamaš barggus Dorvogoađi fuolahusguovddážis lávvordaga 30.10. 

– Mii leat gidden fuolahusguovddáža gussiide ja mii váldit jođanisiskosiid buot bargiin ja ássiin beaivválaččat. Dasa lassin váldit PCR-iskosiid juohke nuppi beaivve, muitala Guovdageainnu suohkandoavttir Anne Lajla Kalstad.

– Galget čuovvut bures mielde

Okta eará ges lea duođaštuvvon korona  lea leamaš mannan duorastaga skábmadiscos Sámi joatkkaskuvlla ja boazodoalloskuvlla faláštallanlanjas.

– Son lei doppe gaskkal dii. 17:00 ja 19:00. Dát olmmoš lea maiddái leamaš kulturskuvlla mánáidteáhterčájálmasas gaskavahkku 27.10.21 kulturviesus dii. 18:00-19:30, čállá suohkan iežaset ruovttusiiddus.

– Sii geat leat leamaš doppe galget čuovvut bures mielde jus dovdagohtet dávdamearkkaid ja váldit iskosa jus leat covid-19 dávdamearkkat.

– Jođánisiskkus buoret go PCR-iskkus

Kalstad muitala suohkana juohkán sullii 200 ruovttoiskosa álbmogii daid maŋemus beivviid.  Son lohká dáid iskosiid dovdat koronadávdda liikká bures, ja vel buoret, go PCR-iskosat.

– Ruovttuiskosat ja jođánisiskosat leat liikká buorit go eará iskosat. Mun in livččii geavahan daid iskosiid jus daidda ii livččii sáhttit luohttit. Dál mii geavahit PCR-iskosiid dušše jus jođánisiskkus lea čájehan positiiva iskkusbohtosa. Jus livččiimet atnán dušše PCR-iskosiid de eat livččii ožžon liikká máŋga positiiva iskkusbohtosa go dál dahkat, dadjá Kalstad. 

Čuovvu ovdáneami

Son lohká vásihit ahte olbmot leat eambbo balus dál go dávda leavvá báikkálaččat, muhto deattuha ahte son čuovvu bures mielde movt dilli ovdána, diimmus diibmui, ja ahte Guovdageainnu suohkan čuovvu buot nationála njuolggadusaid mat leat bidjon Covid-19 oktavuođas. 

Son lohká Norggas leat bures hárjánan dan bargui ahte bissehit dávdda leavvamis.

– Álbmot sáhttá luohttit midjiide ja dan bargui maid mii dahkat. Mis leat juste dál dušše njealje positiiva koronanjoammuma. Mii eat sáhte ásahit doaibmabijuid ovdal lea dárbu dan dahkat.

– Álbmoga bargu lea dahkat dan maid sii ávžžuhit dahkat. Juohkehaš galgá mannat iskosa viežžame jus oažžu dávdamearkkaid. Muđui galget buohkat eallit nu movt dábálaččat, mannat skuvlii ja mannat bargui, dadjá Kalstad.

Dieđihit rievdadusaid

Suohkandoavttir deattuha maid ahte álbmot boahtá dieđuid oažžut jus mihkkege rievdá dahje jus ásahuvvojit sierra doaibmabijut. 

– Buot daid dieđuid maid álbmot dárbbaša diehtit, daid mii addit. Mii eat čiegat maidege, mii dieđihit buot mii lea relevánta álbmogii. Jus lea juoga maid álbmot galgá dahkat, de mii dieđihit dan. Jus eai gula mis maidege de ii leat mihkkege ođas, dadjá Kalstad.

Deanus behtolaš iskkus

Deanus duođaštuvvui mannan bearjadaga koronadávda ovtta olbmos jođanisiskosa bokte, muhto gielda dieđiha mánnodatiđida ahte PCR-iskkusboađus ii lean positiiva. Dat mearkkaša ahte dán olbmos ii lean koronadávda.

– Muhtomin sáhttá dáhpáhuvvat ahte jođánisiskkus čájeha boastu bohtosa. Danne lea dehálaš ahte buohkat geat ožžot positiiva bohtosa jođanisiskosis maiddái váldet PCR- iskosa, čállá Deanu gielda iežaset neahttasiidduin.

Dálvvesvákki skuvllas njoammun

Gáivuona suohkanis, Dálvvesvákki skuvllas, duođaštuvvui mannan lávvordaga koronadávda ovtta gaskadásioahppis.

Dálvvesvákki skuvlla rektor, Britt Pedersen, čállá skuvlla Facebook-siiddus ahte mánnodaga sáhttet buot oahppit ja oahpaheaddjit geat gullet gaskadássái viežžat ruovttuiskosiid skuvllas. Maiddái eará oahppit ja oahpaheaddjit besset iskosiid váldit.

– Okta bargi mis lea oahppan movt iskosiid galgá váldit. Lea álki iskosa váldit ja muhtun bargit mis sáhttet veahkehit iskosa váldit mánáin, čállá rektor.

Gáivuona suohkandoavttir, Anita Monsen Pedersen, čállá suohkana neahttasiiddus ahte eai dieđe gos njoammun lea boahtán.

– Nu guhká go eai leat makkárge dávdamearkkat de sáhttet buot oahppit ja oahpaheaddjit boahtit skuvlii, čállá suohkandoavttir.

Porsáŋgu, Áltá ja Romsa

Porsáŋggu gielddas duođaštuvvui njealji olbmos korona mannan bearjadaga. Oktiibuot leat čieža olbmo Porsáŋggu gielddas dál isolašuvnnas.

Mannan vahkkoloahpa lea Álttás njommon dávda 38 olbmui. Dál leat oktiibuot 51 olbmo Álttá suohkanis isolašuvnnas.

Maiddái Romssa suohkanis leavvá dávda. Romssas ledje mannan bearjadaga 186 olbmo isolašuvnnas. 15 dáin olbmuin leat buohcciviesus. 

-Almmuhus-