Lapin Kansa aviisa dieđiha ahte lea gávdnon koronadávda muhtin bargis ovtta boradanbáikkis Levis mannan vahkkoloahpa.
Seamma njoammunbálgás sáhttá vel nuppi olbmui njommon korona go Gihttelis lea maid olbmos dieđihuvvon korona, ja son lea galledan seamma boradanbáikki, Gondola Resturanta, Levis. Nu dieđiha Lapin Kansa aviisa.
Maiddái Roavvenjárggas leat gávdnon koronanjoammumat. Muhtin bargis Touhula Korkalovaaras mánáidgárddis Roavvenjárggas lea dieđihuvvon korona. Dál leat buot mánáidgárddi 20 bargi ja 88 máná erremis.
Lappi guovllu buohccedivššu njoammuneastadandoavttir Markku Broas muittuha buot ássiid Davvi-Suomas ahte njálbmesuoji rávvejit geavahit buot almmolaš báikkiin ja johtolagain.
