Mannan vahkus duorastaga duođaštedje korona muhtin boarrásiidsiiddas Jielleváris.
Dál, moadde beaivvi maŋŋel, dieđiha Jiellevári gielda ahte 12 vuorasolbmui lea njommon covid-19 dávda seamma boarrásiidsiiddas. Jiellevári gielddas lea dál boarrásiidsiiddas eanet njoammun go sis goassege lea leamaš, dan birra dieđiha P4 Norrbotten.
Jiellevári gieldda sosiálahoavda Annette Viksten Åhl lohká ahte lea duođalaš dilli go nu olu vuorasolbmuide lea njommon dávda.
– 12 vuorasolbmos lea dál duođaštuvvon korona. Dat sáhttet leat vel eambbosat geaidda dávda lea njommon, go mii leat ain vuordime koronaiskosiid bohtosiid. Dat lea erenoamáš dilli ja mun lea surolaš. Balan ahte lea eanet njoammun olles servodagas, čilge Viksten Åhl P4 Norrbottenii.
Vuorasolbmot leat dál biddjon erremii ja sii ožžot divššu boarrásiidsiiddas.
