Gávcci ođđa koronanjoammuma leat duođaštuvvon Lappi guovllus Suomas.
Guokte njoammuma leat gávdnon Roavvenjárggas.
Anáris ja Ohcejogas leat maid duođaštuvvon ođđa njoammumat.
– Dat infekšuvdna sáhttá njommon Levi čierastallandoaluid oktavuođas mannan vahkkoloahpa, čilgii Markku Broas, Lappi guovllu njoammuneastadandoavttir Yle ođđasiidda.
Anáris korona
Anára gieldda jođiheaddji doavttir Outi Liisanantti dieđiha gieldda neahttasiiddus ahte sii leat guorrame njoammunbálgá dal.
Ohcejoga gielda dieđiha maid ahte Ohcejogas lea duođaštuvvon dál duorastaga korona muhtin olbmos.
– Olmmoš lea erremis ja dearvvašvuođafuolahus lea guorragoahtán njoammunbálgáid, čállet gieldda neahttasiiddus.
Maiddái Muonios ja Soađegilis leat gávnnahan koronanjoammumiid. Muonios lei muhtin Ruošša čuoigis dieđihuvvon korona muhto joavku lea dál mátkkoštan ruoktot Ruššii.
Soađegilis gávnnahedje Nutukka buhcciidruovttus korona, ja doppe váldet dál ođđa iskosiid bearjadaga, nu dieđiha Soađegili gielda.
