-Almmuhus-
OĐĐASATKORO ráhkadan sámi giella­plána

KORO ráhkadan sámi giella­plána

-

-

Mannan čavčča mearridii KORO sámi giellaplána. Dás muitala KORO direktevra Sigurd Sverdrup Sandmo dan birra. 

KORO direktevra Sigurd Sverdrup Sandmo muitala ahte KORO vuoruhisgoahtá sámegiela dás ovddosguvlui, erenoamážit mii guoská gulahallamii ja gaskkusteapmái neahtas. Dat guoská maid dáidagiid galbemii gos geahččit oidnet dáidaga. Lohká lea vuosttaš lávki buoret guvlui, preassadieđáhusas.

Son lohká ahte vaikko KORO lea uhca ásahus bargiid ektui, de lea sis dehálaš rolla gaskkustit ja hálddašit sámi dáidaga, kultuvrra ja historjjá. Muitala ahte go KORO šaddá oassin huksenprošeavttain Sámis, de lea dáid prošeavttain sámepolitihkalaš ulbmil loktet sámegiela ja kultuvrra ja danin čadno dáid prošeavttain dáidda giellapolitihkkii.

Dasa lassin, joatká son, de čájehuvvo maid dáidda sámi giellaguovllus, ja dalle berrejit maid sihke teavsttat ja eará gaskkustanmateriálat leat sámegillii, nu mo sámeláhka dáhttu. Lohká KORO lea gal čuvvon dan, muhto lea dárbu dan vuogádahttit.

Stuorát áigumušat

KORO direktevra Sigurd Sverdrup Sandmo muitala ahte olggobeale Sámi leat olu sámi dáidagat maid berrešii gaskkustit sámegillii. Lohká sis leat maid dáidagat main lea stuorra almmolaš árvu ja sámi albmot galggašii beassat daid ge oaidnit, beroškeahttá lea go dáiddáris sámi duogáš vai ii. Ráđđehusgoartilii biddjojit maid sámi dáidagat ja dat galget maid gaskustuvvot sámegillii.

Britta Marakatt-Labba dáidda Garjját. 1981, Govva: © Aad Hoogendoorn/ KORO
Britta Marakatt-Labba dáidda Garjját. 1981, Govva: © Aad Hoogendoorn/ KORO

Direktevra lohká  plána vuhtii váldit giellaovddasvástádusa, mii KORO:s lea sámi dáidaga diŋgojeaddjin, hálddašeaddjin ja gaskkusteaddjin. Plána dohkkeha maid sámi dáiddasuorggi mearkkašumi KORO servodatbargogohččumii Norggas ja Sámis.

Sámegiellaplána dárogillii ja sámegillii.

KORO sámi dáiddaprošeavttat

Outi Pieski galgá ráhkadit monumentála dáidaga ráđđehusgoartilii Oslos.

Geir Tore Holm lea ráhkadan vuosttaš dáidaga, givjja, man oaidná go boahtá Ä´vv nuortalaš museii, mii lea Njávdámis Finnmárkkus.  

KORO:s leat olu dáidagat maid Iver Jåks lea ráhkadan, nu go UIT Norgga árktalaš universitehtas, maiddái Saemien Sijtes Snoasas. 

Tomas Colbengtson lea maid ráhkadan dáidaga Saemien Sijtii ja Sámediggái.

Hilde Skancke Pedersen lea ges ráhkadan dáidaga dievasčoahkkinlatnjii.

-Almmuhus-