Ellos Deatnu-joavku lágida dán mánu doarjjakonseartta Ohcejogas. Konsearttain ávžžuhit álbmoga searvat sámi vuoigatvuođa bargguide.
Ellos Deatnu-joavku lágida dán mánu doarjjakonseartta Ohcejogas. Konsearttain ávžžuhit álbmoga searvat sámi vuoigatvuođa bargguide.
Ellos Deatnu-joavku leat mihcamáraid rájes akšuneren Deanosoahpamuša vuostá, ja leat ásahan moratorio Čearretsullui Deanus.
Dál joavku lágida doarjjakonseartta, masá leat fidnen beakkán artisttaid, nu go Paleface, Wimme Saari ja Niko Valkeapäa.
– Váldoulbmilin lea čohkket olbmuid miehtá Deanučázádaga ja eará guovlluin maid. Ellos Deatnu lea dušše okta jovkkoš. Mii háliidit ávžžuhit ja movttiidahttit olles álbmoga doaibmagoahtit sámiid ja luonddu vuoigatvuođaid bealis. Aiddo dál dárbbašuvvo buohkaid veahkki, cealká Beaska Niillas, Ellos Deanu gulahallanolmmoš.
Ruđalaš ulbmil doarjut joavkku doaimmaid
Moratorio galgá doalahuvvot Čearretsullos olles geasi. Ellos Deatnu julggaštii ovdalaš mihcamáraid moratorio Deanu Čearretsullui ja jođihii álbmotčoahkkima Ohcejogas. Joavku ovddida sámiid iešmearrideami Deanučázádagas.
– Doarjjakonseartta ruđalaš ulbmilin lea doarjut Ellos Deatnu -joavkku doaimmaid. Sisaboahtu geavahuvvo stuorra čoahkkinlávvui ja uhcit goluide dego borramuššii, boaldinmuoraide ja bensiidnagoluide, lohká Áslat Holmberg Ellos Deatnu-joavkkus.
Olu artisttat
Konsearta lágiduvvo Ohcejoga Busteldearpmis suoidnemánu 25. beaivvi, diibmu viđas. Ellos-Deatnu joavku cealká preassadieđáhusas ahte dilálašvuođa beakkáneamos artista lea suoma hip-hop artista Karri «Paleface» Miettinen.
– Háliidan doarjut Ellos Deatnu -joavkku ja buot sápmelaččaid. Sin sajádaga ferte ain nannet. Sámiid jietna ferte gullot Suoma ja Norgga servodagain, erenoamážit sin árbevirolaš ealáhusaide guoski mearrádusain, lohká rap-artista Paleface.
Eará artisttat geat servet doarjjakonsertii leat Ailu Valle, Ammon Johnskareng, Amoc, Ánde Somby, Dutta Per Ándde Juhán, Niillas Holmberg, Sara Marielle Gaup Beaska ja Ulla Pirttijärvi.
