Sámi Dáiddaguovddáš bovde searválaga Davvi Lávddiin konsertii.
Sáráhkká lea sámiid dološoskku nissonipmil, gii várjalii ogi eatni heakkas, veahkehii áhpehemiid ja riegádahttimiid. Sus lei guovddáš rolla sivdnideames ja riegádahttimis, ja lei okta daid ipmiliin mat ledje guovddážis sápmelaččaid árgabeaivvi eallimis.
Sámi kultuvrras lea nissonis nana sájadat árbevierroguoddin, go dat lei nisu gii fievrridii juoigama, ja maiddái dan giela maŋisboahtti buolvvaide go juoiggai njuoratmánáide.
– Sáráhkká -prošeavttain háliidat ahte sámi nissoniid jietna ja historjá galgá gullot ja seammás maiddái bajidit Sámi iešguđet guovlluid árbevirolaš juoigama árvvu, čállá Sámi Dáiddaguovddáš preassadieđáhusas.
Konseartta oasálaččat leat Ingá-Máret Gaup-Juuso – juoigan/vokála, Patrick Shaw Iversen – njurggonasat/elektronihkka, Harpreet Bansal – fijuvla ja Kenneth Ekornes – rumbbut.
