Ruoŧa sámi konfirmašuvdnaleairra lágideaddjit leat buktán evttohusa movt čađahit dán jagi konfirmašuvnnaid Ruoŧa beale Sámis.
Sámi konfirmašuvnnat Ruoŧa bealde dollojuvvojit dábálaččat geassemánus juohke jagi. Koronadávdda geažil leat dán jagi konfirmašuvnnat sirdojuvvon ja dál leat konfirmašuvdnaleairra lágideaddjit, Edelviks folkhögskola ja Ruoŧa girku, buktán evttohusa movt čađahit dán jagi sámi konfirmašuvnnaid.
Evttohusas boahtá ovdan ahte 60 konfirmántta galget juhkkojuvvojit njealji jovkui. Juohke joavku vuolgá golggotmánus moadde beaivvi sierra deaivvadeapmái dan guovllus gos leat eret dahje orrot. Konfirmánttat čoahkkanit fas deaivvadeapmái boahtte jagi álggus ja konfirmašuvdnaipmilbálválus šaddá buot konfirmánttaide ođđajagemánu 6. beaivvi 2021, Burträskas. Dán dieđiha SVT Sápmi.
