-Almmuhus-
OĐĐASATKoloradogobbá áitá Norgga buđetšattu

Koloradogobbá áitá Norgga buđetšattu

-

-

Vuosttaš gearddi lea koloradogobbá gávdnon buđetšattuin Norggas. Jus dát leavvá, de dat áitá buđetealá­husa, váruha Biebmobearráigeahčču.

Koloradogoppát gávdnojedje muhtin gilvvagárddis Modum suohkanis mannan vahkku. 

Biebmobearráigeahčču dieđiha ahte leat jo ásahan doaibmabijuid vai goppát eai leavaše buđetbealdduide. 

Jus koloradogoppát levvet Norggas, de lea dát áittan buđet­ealáhussii. 

– Jáhkkimis eai leava koloradogoppát go dán guovllus eai leat buđetbealddut. Mii vákšut gilvvagárddi, ja ávžžuhit eará buđetbuvttadeddjiid ja šaddogávppiid čuovvut mielde vai nagodit jávkadit vahátdivrriid áiggil, dadjá Biebmobearráigeahču šaddoossodaga seniorráđđeaddi Kåre Jacob Willumsen preassadieđáhusas. 

Koloradogoppát eai leat váralaččat olbmuide.

-Almmuhus-