-Almmuhus-
OĐĐASATKLP geassáda investoran DAPL fitnodagain

KLP geassáda investoran DAPL fitnodagain

-

-

KLP lea maŋimuš áiggiid beaggimiid dihte Dakota Access Pipeline birra, mearridan geassádit ruhtadeaddjin fitnodagain main leat čanastagat dán prošektii, go lea riska ahte rihkkot olmmošvuoigatvuođaid.

DAPL

Dakota Access Pipeline (DAPL) lea oljorevrre mii lea birrasiid 1900 kilomehter guhko, dan čađa galget golggahit skiferoljju Bakken-guovllus Davvi-Dakotas dán njealji amerihkálaš stáhta čađa: Davvi-Dakota, Lulli-Dakota, Iowa ja Illinois.

 

Juovlamánus diibmá bissehedje amerihkálaš eiseválddit US Army Corps of Engineers bokte, dan maŋimuš lobi mii dárbbašuvvui vai besset hukset Oahe-jávrri vuolde lahka Standing Rock, Sioux álbmoga guovllus, dassái go viidábut leat guorahallan birasváikkuhusaid ja árvvoštallan eará guovlluid gosa sáhttet revrre hukset. 

 

Maŋŋil go USA:s lonuhuvvui presideanta, de addui ođđa presideantagohččuin (executive order), mii dagahii ahte plánejuvvon birasguorahallan bissejuvvoi ja addui fas lohpi gárvet prošeavtta.

 

Dieđut: KLP

Kommunal Landspensjonskasse (KLP) lea mearridan geassádit investorin Energy Transfer Partners, Phillips 66, Enbridge Inc. ja Marathon Petroleum Corporation fitnodagain, go oaivvildit leat dohkketmeahttun riska leat mielde olmmošvuoigatvuohtarihkkumiin, čállá fitnodat preassadieđáhusastis.

 

Eai leat guldalan álgoálbmogiid

Njukčamánu 3. beaivvi doalai ON erenoamášrapporterejeaddji álgoálbmotáššiid birra, preassakonferánssa maŋŋil go lei galledan USA ja Davvi-Dakota.

Rapporterejeaddji logai ahte álbmogat geasa dát prošeakta čuohcá, eai leat doarvái bures konsulterejuvvon prošeavtta olis ja son logai leat fuolastuvvan go presideanta Donald J. Trump, lea addán lobi gárvet Dakota Access Pipeline (DAPL) almmá viidát birasguorahallama haga.

 

Čuvvon ášši

KLP buvttada penšuvdna-, finánsa- ja dáhkádusbálvalusaid gielddaide, fylkkagielddaide, dearvvašvuođadoaimmahagaide ja fitnodagaide sihke almmolaš ja priváhta sektoris.

Sii leat áŋgirit čuvvon ášši ja leat maŋimuš jahkebeali árvvoštallan dieđuid mat gávdnojit, gulahallan fitnodagaiguin, álbmogiin geasa DAPL váikkuha, álbmoga advokáhtain, biras- ja olmmošvuoigatvuohtaorganisašuvnnaiguin, revreáššedovdiiguin ja miellačájeheddjiiguin geat leat báikkis.

Go dál leat válljen geassádit investorin, de leat erenoamážit erenoamášrapporterejeaddji cealkámuš ja presideantagohččun mii almmuhuvvui ođđajagis, vuođđun mearrádussii.

– Lea leamaš váttes ášši. KLP lea garrasit deattuhan ON erenoamášrapporterejeaddji árvvoštallama, Stáhta penšuvdnafoandda Etihkkaráđi ávžžuhusa ahte hilgut dáid fitnodagaid, ja váilevaš bohtosiid eaiggátvuođadoaimma bokte, go leat mearridan ná, lohká Annie Bersagel, guhte lea konstituerejuvvon jođiheaddji KLP Kapitalhálddašeami ovddasvástideaddji investeremiin.

 


KONSEARNAHOAVDA: 
Sverre Thornes lohká iežas leat vissis das ahte leat riekta mearridan go geassádit ruhtadeaddjin. 

Preassagovva: KLP

Eai lihkostuvvan váikkuhit fitnodagaide

Árabus lea Stáhta penšuvdnafoandda olgoriikaossodat, guhte meannuda álgoálbmotvuoigatvuođaid, maid ávžžuhan ahte KLP doalaha dieid fitnodagaid olggobeale iežaset investeremiid, dat lea maid váikkuhan KLP mearrádussii.

KLP ii leat doarvái lihkostuvvan váikkuhit fitnodagaide ja prošektii gulahallama ja eaiggátvuođadoaimmas bokte.

– Mis lea leamaš vuđolaš ja guhkes proseassa dás. Ášši lea leamaš moalkái, muhto mun lean oadjebas das ahte leat dál mearridan riekta, lohká KLP konsearnahoavda Sverre Thornes.

Oktiibuot ledje KLP:s investeremat sihke ossosiid ja obligašuvnnaid bokte birrasiid 580 miljovnna ruvnnu ovddas dáin fitnodagain.

Olles ákkastallama dasa go dál geassádit dáin investeremiin beasat dás lohkat.

 

 

-Almmuhus-