Njealját geardde dán jagi vuolida Kiwi-rámbuvra hattiid. Rema ja Coop Extra leat čuvvon vuolidemiid.
Dán háve leat čoavddaráigegálvvut main vuoliduvvojit hattit. Kiwi lea dat rámbuvra mii álggaha haddegičču.
– Dá lea vel okta stuora vuolideapmi midjiide. Dá leat gálvvut maid mii vuovdit ollu beaivválaččat, dadjá Kiwi gulahallanhoavda, Kristine Aakvaag Arvin, Nettavisenii.
Iđitborramušat ja láibebadjosat, main lea čoavddaráigemearka, leat gálvvut main dán háve vuolidit hattiid. Haddevuolideapmi ii leat oanehisboddii vuolideapmi, muhto bissovaš.
Bivnnuhis borramušat
Muhtin buktagat main dál vuoliduvvot hattit leat Gilde vuššon spiinnečoarbbealli, Lofoten suovasluossa ja Staburet Makrealla tomáhtas. Leat oktiibuot 70 buktaga main hattit vuoliduvvojit ja haddevuoládus lea gaskal 5 ja 20 proseantta.
– Ollu dáin buktagiin leat dakkár buktagat maid mii vuovdit hui ollu. Nu go Gilde vuššon spiinnečoarbbealli, mas mii vuovdit 68 000 páhkka vahkkui, dadjá Arvin.
Dearvvašlaš borramušat
Arvin dadjá ahte sii vuolidit hattiid dearvvašlaš borramušain vai olbmuide galgá leat álkit válljet dearvvašlaš borramušaid.
– Min vásáhus lea ahte olbmot gávppašit dearvvaslaš gálvvuid nu guhká go dat leat hálbbit. 2011:s mii vuolideimmet hattiid čoavddaráigegálvvuin seamma ollu go momsa lea, ja dalle lassánii gálvojohtu 22 proseanttain, dadjá Arvin Nettavisenii.
