Altapostena journalista Kita Eilertsen oaččui dán jagi journalistabálkkašumi, ja Ávvira journalisttat Anne Rasmus, Ovlla Gaup ja Astrid Helander ožžo árvvolaš máinnašeami.
Lávvardaga doalai Finnmárkku Journalistasearvi jahkečoahkkima Čáhcesullos, gos maid juhke bálkkašumiid.
Dán jagi journalistan šattai Altapostena journalista Kita Eilertsen oaččui dán jagi journalistabálkkašumi, áššis go lei čuvvon psyhkalaš doaimmashehttejuvvon Espen Lyng-Hansena ja Signe Marita Ellingsena rahčamuša beassat vázzit joatkkaskuvlla.
Ávvira journalisttaide rápmi
Ávvira journalisttat Anne Rasmus, Ovlla Gaup ja Astrid Helander ožžo dán jagi árvvolaš máinnašeami diploma.
Dan sii ožžo áššis go leat roggan Kárášjoga vuodjinlohpeohcamiid meannudeami.
Das bođii ovdan ahte Kárášjogas lei roavva vealaheapmi ohcanmeannudeamis, go dispalávdegotti lahtut oide fulkkiid ja ustibiid.
Journalisttaid áššit dagahedje earret eará ahte gielda fertii geassit ruovttoluotta vuodjinlobiid ja dispalávdegotti lahtut šadde almmolaččat čilget iežaset bargovuogi.
Mielahis somá!
Ávvira journalista Anne Rasmus lea albma rámis go oaččui árvvolaš mearkkašumi.
– Mielahis somá! Soma go Ávvir oažžu rámi ja lea mielde ovdáneamis nu go buot earáge mediat. Diet lei mu vuosttaš «rogganprošeakta», nu ahte lea duođaid somá lihkostuvvat ja oaidnit ahte earát atnet árvvus min barggu. In lean vuordán oažžut dakkár diploma, lohká Anne Rasmus.
Amas historjjá roggan albmosii
NRK Finnmárkku journalista maid oaččui árvvolaš máinnašeami diploma go girjehámis lea viidát roggan CIA ja NSA amas historjjá Finnmárkkus.
Su ášši lea boktán našuvnnalaš ođasberoštumi ja digaštallama sihke sis- ja olgoriikkas.
Son oaččui 2012:s Finnmárkku Journalistasearvvi bálkkašumi girjjiin «Satelittkrigen», ja son lea mátkkoštan miehtá máilmmi ja doallan semináraid iežas gávdnosiid birra.
