Kirku SOS lea vástidan lagabui 3000 telefovnna dán vahkus. – Olusiidda leamaš juovllat oalle lossadat ja leamaš olu ságastallan iešsorbmema birra. Jáhkkimis dat vuolgá go dál lea pandemiija mii vuorjá olbmuid ja dagaha ahte muhtumat dovdet iežaset eambbo okto, lohká váldočálli Lasse Heimdal.
Juovlamánu 23.beaivvis gitta 28. beaivái vástidii Kirku SOS oktiibuot 2885 telefovnna, mii lea 481 telefovnna juohke jándoris dahje 20 telefovnna juohke tiimmus.
– Mii oaidnit dát dáhpáhuvvá juohke basiid ahte olbmot dovdet oktonasvuođa. Muhtun olbmuide lea oktanasvuohta earenomáš eahpedorvvolaš, seavdnjat ja bávččas, lohká Heimdal.
Iešsorbmen jurdagat
Birrasii 15,7 proseantta dain ságastallamiin leat leamaš iešsorbmema birra. Proseantta hárrái lea seamma olu go jagi 2019:s, go dalle lassánedje iešsorbmen ságastallamat roassobálvalusain. Lagabui 50 proseantta nuorain geat leat juogadan iežaset iešsorbmenjurdagiid leat geavahan SOSchat.no ja Kirkens SOS chat-bálvalusa.
– Kirku SOS ávžžuha buohkaid váldit eambbo vára nubbi nuppis dáid juovlabasiid ja áiggi ovddosguvlui, ávžžuha Heimdal.
Son ávžžuha olbmuid čájehit beroštumi skihpáriidda, kránnjáide ja bargoskihpáriidda, dahje dušše moddjestit dahje seavestit olbmuide.
– Livčče maid buorre riŋgestit olbmuide, hástit fárrui váccašit dahje dušše háleštit veaháš, lohká Heimdal.
