Servvodatsihkkarvuođa- ja gearggusvuođadirektoráhta ođđasamos statistihka čájeha kievkkanuvnna buollimat leat sivvan 41 proseantta háviide manin dollačáskadeaddjit fertejit vuoddját buollima čáskadit. Eaŋkil kievkkanuvdnafákta sáhtášii čoavdit váttisvuođa ja hehttet du ruovttu gutnan buollit.
Servvodatsihkkarvuođa- ja gearggusvuođadirektoráhta (DSB) dieđiha ahte buollin- ja gádjunásahusat fertejedje jagis 2022 vuoddját 4 641 buollima ja buollinálgguid čáskadit priváhta ruovttuin. Oktiibuot álge 1894 (41 proseantta) buollima kievkkanuvnna dihtii. 86 proseantta buollimiin álge go olbmot leat vajáldahttán borramuša dahje čázi liegga uvnna ala.
– Eanaš kievkkanuvdnabuollimat dáhpáhuvvet beaivet ja čuhcet borrasat olbmuide. Boares olbmuin lea stuorámus riska jápmit buollimis. Stuorámus oassi kievkkanuvdnabuollimiin lea go kievkkanuvdna ii leat jáddaduvvon ja go lea badjelmeare báhkkanan, iige teknihkalaš boasttuvuođaid dihte. Eaŋkalis kievkkanuvdnafákta lea buoremus sihkkarvuohta go dat jaddada uvnna ja hehtte buollima, lohká Brannvernforeningen hálddahuslaš direktevra Rolf Søtorp ja lasiha:
– Ja de eai dárbbaš dollačáskadeaddjiid vuoddját dárbbašmeahttun buollimiid čáskadit.
Ođđa viesuin ja maiddái go ođasmahttá kievkkana, lea gáibádus ahte biddjo kievkkanuvdnafákta. Dát gáibádus bođii 2010:s. Kievkkanuvdnafávtta lea álki bijahit. Das lea sensor ja elrávdnjeboatkkan mii dieđiha go lea buollinriska ja jus olbmot eai reagere, de botke elrávnnji. Kievkkanuvdnafákta galgá čuovvut riikkaidgaskasaš njuolggadusa, NEK EN 50615, mii sihkkarastá dan kvalitehta. Leat guokte šlája, nuppi sáhtát ieš bidjat el-čuggestahkii, muhto nuppi šlája ferte elektrihkkár bidjat.
– Ávžžuhan buohkaid dan bijahit, lohká Brannvernforeningen hálddahuslaš direktevra Rolf Søtorp.
Son rávve olbmuid álo leat gozuid alde go geavahit kievkkanuvnna. Álo jáddadit dan jus ferte dan guoddit telefovnna, olbmuid dihtii dahje eará dihtii.
