Kevin Boine lea ollen loahpageahčái iežas geassemátkkošteami. Son galgá čuojahit oktiibuot 15 konseartta festiválain miehtá Norgga, čállá Universal Music preassadieđáhusas.
Davvi-Norgga beakkálmas Kevin Boine lea ráhkadan ráhkisvuođajulggaštusa man lea gohčodan «Aurora».
Lávlla lea romantihkalaš muitalus mii lea ráhkaduvvon metaforan dan čáppa «Aurora Borealis» dahje guovssahasa birra mii báitá almmis Hámmárfeastta bajábealde.
– Mus leat hui čavges čanastagat Davvi-Norgii ja danne háliidin mun čállit lávlaga juoga man nu birra man oallugat dovdet. Buohkain dieđus ii leat gaskavuohta guovssahassii, muhto buohkat sáhttet jurddašit movt ráhkisvuohta lea. Dan dihte lean ge čállán lávlaga nu ahte buot guldaleaddjit ipmirdit makkár ráhkisvuohta mus lea Davvi-Norgii ja guovssahassii, čállá Kevin Boine preassadieđáhusas.
Lassánan beroštupmi
Nuorra artista lea johtime iežas geassemátkkis gos galgá oktiibuot čuojahit 15 konseartta festiválain miehtá Norgga.
Maŋŋel su logát saji lávlaga, «Swipe up», man son ráhkadii dovddus influeansáriin Martine Lundein fárrolaga, lea beroštupmi loktanan hirbmosit davvi-norgalažžii.
Čuojahuvvon 55 miljovnna geardde
Measta čiegusvuođas lea Boine šaddan okta Davviriikkaid stuorimus dárogielat artisttain.
Su musihkka lea čuojahuvvon badjel 55 miljovnna geardde.
25-jahkásaš sveisejeaddji, gii lea Kárášjogas eret, čuojaha ja lea geasuheaddji stuora festiválain gos leat duháhiid mielde guldaleaddjit miehtá Skandinávia. Eai leat maid máŋga artistta su šáŋŋeris geat čuojahit riikkaidgaskasadját.
Son gohčoduvvo Finnmárkku partygonagassan – ja dát gonagas lea gearggus vuoitit feasta miehtá Skandinávia ja muđui ge máilmmis, čállá Universal Music preassadieđáhusas.
