Kevin Boine lea juo ávvudan «raggariid» guokte ruoŧagielalaš lávlagiin ovdalaš dán jagi, ja dál lea gearggus goalmmát singeliin, Supa.
Lávlla lea dan birra man olu mii váillahit festiválaid, live-musihka ja stuora olmmoščoagganemiid, ja man dolkan mii leat koronas ja dain gáržžidemiin maid dat buktá.
Kevin liiko bures «raggariidda», ja dat boahtá bures ovdán lávlagis. «Alla raggare i staden, måste supa! Alla brudar alla menn, vi ska supa!».
– Festiválat álget smávvát lágiduvvot fas, ja buohkat illudit dasa. Mii háliidat festiválii, háliidat juhkat ja eallit nu go ovdal. Go leat orron isolašuvnnas ovddeš sosiála eallimis, dagaha ahte olusat álget garrasit go vuos besset, dadjá Boine preassadieđáhusas.
