Ohcejohkalaš Pigga Keskitalo álgá árktalaš skuvlengažaldagaid professoran Lappi universitehtii čakčat.
Keskitalo lea doaibman jagi 2019 rájes Lappi universitehta dieđagotti universitehtadutkin. Son lea ovdal bargan Sámi allaskuvllas Guovdageainnus. Keskitalo lea nákkáhallan bajásgeassindiehtagiid doavttirin Lappi universitehtas 2010:s.
Deaŧalaččat oahpahusas
Keskitalo deattuha, ahte fátmmasteaddji jurddašeapmi ja áiggi ja báikki mearkkašumi áddejupmi leat dehálaččat, go oahpaheaddjit skuvlejuvvojit ja lágiduvvo oahppu mánáide ja nuoraide. – Mu ulbmil lea nannet ipmárdusa iešguđetlágan logihkain, mat váikkuhit bajásgeassimis ja skuvlejumis. Árktalaš guovlluin orrot olu iešguđetlágan eamiálbmogat ja eamiálbmotgielaid hállit. Olbmuid gaskasaš ipmárdusa lasiheapmi ja deaivvadeapmi ja nuppe dáfus áitojuvvon gielaid ealáskahttin leat áigeguovdilis fáttát, mat dárbbašit eambo fuomášumi dilis, mii lea šaddan ovddibu máŋggabealageabbon.
Čiekŋudit áddejumi
Pigga lea leamašan fárus máŋggain riikkaidgaskasaš doaimmain nannemin máhttima riikarájáid rastá ja giella- ja kulturdiđolaš oahpaheaddjevuođa ja oahpaheaddjeskuvlejumi fitnuin.
– Háliidan čiekŋudit áddejumi guovlluid historjjáin, dálá diliin ja das, mo skuvlejumi ja oahpahusa galggašii lágidit nu, ahte dat váldá vuhtii guovlluid iešvuođaid ja ohppiid dárbbuid čilge son preassadieđáhusas.
