Nu lohká Klemet Anders Buljo guhte iđđes fuomášii ahte lihttebassanmášiinna el-čuggestat lei buollámin.
Nu lohká Klemet Anders Buljo guhte iđđes fuomášii ahte lihttebassanmášiinna el-čuggestat lei buollámin.
– Eamit lei iđđes bidjamin lihttebassanmášiinna johtui go fuomášii ahte dan duohken gullo ártegis jietna, dego jurramin. Mun lean dakkár jiena vásihan ovdal ja árvidin mii dat lei, nu ahte ii lean earágo jáddadit
mášiinna, čilge Klemet Anders Buljo.
Ovdal vásihan seamma
Go rohttii mášiinna eret seainnis ja geahčai dan duohken de oinniige ahte el-čuggestat lei šolgamin.
– Mus lea gárašas oktii leamaš nie, danne dovden ge dan jiena ja dihten dás ii leat eará go riŋget eletrihkárii, čilge son.
Klemet Anders govvii čuggestaga ja almmuhii dan váruhussan facebookas.
– Mun lean hui árgi buollimiidda, go ledjen mánná de bulii mis viessu ja dan in leat vajáldahttán goassege. Danne bidjen ge maid gova dás facebookii, vai olbmot dihtet geahččat bearrái iežaset elrusttegiid. Go diekkárat báhkkanit ja šolgagohtet, de dat sáhttá dáhpáhuvvat maid seainne siste. Sáhttá bullehit olles seainni buollát ja hui jođánit. Dát livččii sáhttit leat katastrofa dušše minuhtaid duohken, muitala son ja lohká iežas healkkehan.
Vuorkágovva: Nils Johan Vars
Olu el-rusttegat
Klemet Anders guhte lea dovddus musihkkar ja musihkkabuvttadeaddji Sámis, muitala iežas leat hui dárkil dákkár rusttegiiguin.
– Mus lea musihkkastudio gealláris, gos leat olu el-rusttegat ja el-jođđasat ja láven daid dárkkistit vai eai buollá, čilge son.
Dál lea eletrihkkár fitnan su geahčen.
– Son čilgii ahte diekkár el-čuggestagat eai leat oaivvilduvvon ná stuorra mášiinnaide. Muitalii maiddái ahte ovdamearkka dihte čáhceliggenrusttegiid ii leat lohpi šat dábálaš el-čuggestagaide bidjat muhto galget njuolgga elfápmofierpmádahkii laktojuvvot go ođđa viesuid huksejit, čilge Klemet Anders.
Buljo gal ávžžuha olbmuid iskat iežaset el-čuggestagaid ja gávnnahit makkár rusttegiid dat girdet.
40 proseantta buot stohpobuollimiin vulget elektrihkalaš rusttegiin, čállá sikkerhverdag.no neahttasiidu, gos leat neavvagat sihke mo eastadit buollimiid, muhto maiddái eará bárttiid nugo trampolina-lihkohisvuođaid.
