-Almmuhus-
-Almmuhus-
-Almmuhus-
SMÁVVAOĐĐASATKatarina Barrukas ilbmá ođđa musihkka

Katarina Barrukas ilbmá ođđa musihkka

-

-

Su ođđa šuokŋa, «Dállie», almmuhuvvo bearjadaga.

Geassemánu 3. beaivvi ilbmá Katarina Barrukis ođđa šuokŋa, «Dállie». Son čállá buot lávlagiid eatnigillii, ubmisámegillii, mii lea ovttain dain eanemus áitojuvvon sámegielain. Dan son dahká go lávlut ubmisámegillii lea áibbas dárbbašlaš su eksistensii, ja son rámálaččat čájeha iežas kulturárbbi.

– Mu musihkka lea seaguhus atmosfearalaš popas, luođis ja improvisašuvnnas, mas fátmmastan fáttáid ráhkisvuođas giellarahčamuššii. Mus lea álo vuolggasadji das mo lea leahkit nuorra sámi nisun dál, dadjá Katarina Barruk preassadieđáhusas.

– Musihkka lea mu eallinvuohki. Vuohki vuoigŋat ja dovdat. Musihkka lea sadji mas lean ieš 100 proseanta. Ja mu mielas lea ubmisámegiella máilmmi fiidnámus giella. Ráhkadit iežan musihka ubmisámegillii lea vuohki bovdet guldaleddjiid mu universii gos Ubmi-Sápmi lea norbma, guovdileamos ja ealas. Mun oaivvildan ahte dárbbašat eambbo dakkáriid mat leat min váimmu lagamusas, ja mun vásihan ahte dávjá ii leat sadji dakkárii dálá servvodagas.

DÁLLIE: Dá lea su ođđa šuoŋa olggoš, «Dállie». olggošgovva.
DÁLLIE: Dá lea su ođđa šuoŋa olggoš, «Dállie». olggošgovva.

Ođđa šuoŋa mearkkašupmi

Preassadieđáhusas čilge Katarina ahte «Dállie» mearkkaša «dál» ja lea inspirerejuvvon das maid ieš gohčoda «agálašboddu». Ii leat dávjá áigi bisána nu, muhto muhtin hárve geardde dovdá olmmoš ahte áigi bisána ovtta boddui. Dan bottu  muitá olles eallenagi. Olmmoš oažžu dušše ovtta liibba ja jus dan ii váldde, de manaha dan agibeaivái.

– Muitit «eallit dál» lea juoga mii álo lea mu fascineren. Geahččalit ipmirdit makkár áiggis mun ealán dál, guovdilastit birrasa ja makkár válggaid dagan. Lea álki manahit dáid magihkalaš bottuid jus ii eale dál. Ferte ipmirdit goas galgá vástidit juo liibbaide, ovdal go áigi manná, čilge Katarina Barruk preassadieđáhusas.

Čuojaha festiválain dán geasi

Katarina Barruk lea válljejuvvon Music Norway «endringsagentan», mas galgá viiddidit kultuvrralaš máŋggabealatvuođa Norgga musihkkasuorggis.

Katarina Barruk oktan musihkkajoavkkuin leat čuojaheame iešguđet festiválain dán geasi, earret eará Riddu Riđus Olmmáivákkis.

-Almmuhus-