Karen Lovise ja earát vuite johtolatsihkarvuođabálkkašumi

Finnmárkku fylkkagieldda kultuvrra, álbmotdearvvašvuođa ja johtalusa váldolávdegoddi lea odne nammadan johtolatsihkarvuođa bálkkašumi vuoiti, dieđiha fylkkagielda preassadieđáhusas.

Guovdageaidnulaččat Karen Lovise Siri, Lovisa Mienna Sjöberg, Liv Karin Klemetsen ja Risten Turi Aleksandersen vuite bálkkašumi, go sii leat áŋgiruššan oažžut vázzingeainnu Gártnetluohká ja riikkageainnu 93 gaskii.

Hoahpuhan vázzingeainnu ráhkadeami

Bálkkašupmi juhkko olbmuide, joavkkuide dahje organisašuvnnaide mat erenoamážit áŋgiruššet buoridit johtolatsihkarvuođa fylkkas.

Bálkkašupmi galgá movttiidahttit dábálaš olbmuid, fitnodagaid, organisašuvnnaid ja earáid geain ii leat bargun áŋgiruššat johtolatsihkarvuođas.

– Dát joavku oažžu bálkkašumi go leat áŋgiruššan buoridit johtolatsihkarvuođa Guovdageainnu suohkanis. Sii leat earret eará sádden evttohusa Guovdageainnu suohkana johtolatsihkarvuođa plánii, mas evttohit ráhkadit vázzingeainnu riikkageainnu 93:s Gártnetluohkkái, čuožžu preassadieđáhusas.

– Rámidit áŋgiruššama

Bálkkašupmi juhkkojuvvo evttohusaid mielde.

Son gii lei dán joavkku evttohan čálii ahte joavku ánssáša bálkkašumi, ja ahte lea vuohki movt rámidit sin áŋgiruššama johtolatsihkarvuođas, lagas birrasis ja álbmotdearvvašvuođas.

– Jus eai lean čállán evttohusa johtolatsihkarvuođaplánii, de ii livčče mis vel ge vázzingeaidnu. Vázzit ja sihkkelastit livčče ain šaddan vánddardit biillaluottas, čuožžu maid evttohusas.

Ruhtavuoitu ja dáidda

Almmolaš bálkkašumi juohkin lea fylkkadikki čoahkkimis golggománu 25. beaivvi Čáhcesullos. Vuoitu lea 30 000 ruvnno ja dáidda.

– Finnmárkku fylkkagielda háliida sávvat lihku Karen Lovise Sirii, Lovisa Mienna Sjöbergii, Liv Karin Klemetsenii ja Risten Turi Aleksandersenii vuoittuin, čállá fylkkagielda preassadieđáhusas.

Ovddeš vuoitit leat earret eará Čáhcesullo gielda, Hámmárfeastta ja Fálesnuori skohtersearvi ja Bearalvági mánáidgárdi.