Sotnabeaivvi beassat oaidnit movt Kárášjohkalaš Aslak Ole Eira birge “Norgga čaffadeamos” tv-ráiddus. Ieš gal lohka nu gealdagasas, ii dieđe duostá go geahččat dan tv:s!
Sotnabeaivvi beassat oaidnit movt Kárášjohkalaš Aslak Ole Eira birge “Norgga čaffadeamos” tv-ráiddus. Ieš gal lohka nu gealdagasas, ii dieđe duostá go geahččat dan tv:s!
Ihttin eahket lea finála tv-ráiddus mas sámi bárdni Aslak Ole Eira lea mielde. Son gilvvohallá šaddat “Norgga čaffadeamosin”, ja lea bures birgen gilvvus dássážii.
Ii duostta geahččat tv:s
Eira muitala ahte son lea hirbmat gealdagasas dál ovdal finála čájehuvvo tv:s, ja go muitá man gealdagasas lei dalle finálabeaivvi.
— Finálabeaivi lei nu gelddolaš, in duostta várra ieš geahččat dan tv:s. Dat lei hui erenoamáš, ja šaddá somá oaidnit. Dalle ledje hui buorit gilvvut, ja lei garraseamos beaivi. Dalle bidje min geahččalit buot fas ođđasit, ja ledje hui garra gilvvut. Mun in báljo muitte ge.
Vuittii gilvvu
Mannán lávvordaga oinniimet go Kárášjoga bárdni vuittii viehkangilvvu, mas galggai gassamáska atnit alde seammás go viehká tráhpáid bajás, ja láirri čađa. Gassamáska dagahii ahte ii leat lihka álki oažžut vuoiŋŋahaga. Eira lei ovttatmanos juo njunnošis, ii ge jovssahallan oba ge. Son ollii ge ovddemus mollii, ja vuittii gilvvu. Go Ávvir jearrá gos son vieččai fámuid, de muitala Aslak Ole ahte son lei šukkulade borran juste ovdal gilvvu, ja ahte das soittii ávki, go de lei álkit doalahit iežas láhtu siskkobealde.
— Ii dat gal várra dahkan ahte vuiten dien gilvvu, muhto soittii veaháš ávki, lohka son.
(Ášši joatká gova vuolde)
Favorihtta
Eará oasseváldit lohke maŋŋil gilvvu ahte lea Aslak Ole gii lea sin stuorámus gilvaleaddji finálas. Okta gilvu sis lei ahte galge heaibut láirris, ja dan maŋŋil maid oaččui Aslak Ole hui olu rámi. Okta gilvaleaddji, Nikola Kovacevic, gii lea Norggameašttir thaia-boksemis, lei hirpmahuvvon Aslak Oles ja rámpui su. Eira muitala ahte son ii diehtán maid earát hupme su birra, ja sutnje lei hui somá gullat go rámpojedje.
— Lea hui somá oaidnit go rámpojit mu. Mun in leat oaidnán tv-sáddaga ovdal, ja šattai hui somá go oidnen.
Lossa vahkku
19-jahkásaš muitala ahte dál maŋŋil son oaidná duššo positiiva beliid oassálastimis, go beasai oahpásnuvvat ođđa olbmuiguin, ja vásihit dakkár ášši maid maŋŋil ii boađe šat vásihit. Son mieđiha ahte oassálastin lei hui hástaleaddji, ja lossat.
— Lei hui lossa vahkku, go šattaimet nagodit borramuša haga, oađđit bávtti siste, gos šattai čađat galbmot. Dán gilvvus ii lean ávki leahkit duššo gievra ja sávri. Mun ledjen nuoramus olles joavkkus, ledjen juste deavdán 19 go tv-ráidu báddejuvvui.
Buorit gilvaleaddjit
Tv-ráiddus leat guhtta oasi, ja sotnabeaivvi čájehuvvo maŋimuš oassi, gos viđas vel leat báhcán finalii. Eira lohka ahte doppe leat olu buorit gilvaleaddji, muhto Nikola lea stuorámus gilvaleaddji. Muđui ii loga gal Aslak Ole nu olu responsa ožžon tv-ráiddus.
— In mun gal dieđe leat go olbmot čuvvon mielde. Dieđusge mu olbmát ja hárjeheaddjit leat geahččan, muhto muđui gal ii leat leamaš mihkke stuorráid, loahpaha Kárášjoga bárdni, gii sotnabeaivvi soaitá šaddat Norgga čaffadeamosin.
Finála čájehuvvo NRK1, sotnabeaivvi diibmu 21.05!
