Kárášjoga gielda jeđđe álbmoga ja čállá ahte soahti ii guoskka vuos kárášjohkalaččaide.
– Mii čuovvut dili dárkilit ja ovttasbargat Stáhtahálddašeddjiin ja riikadási eiseválddiiguin, čállá Kárášjoga gielda ruovttusiiddus.
Norgga eiseválddit čuvvot dili dárkilit ja addet dieđuid gielddaide máŋgii jándoris. Gieldda jođihangoddi oažžu dieđuid Stáhtahálddašeaddjis ja guovddáš eiseválddiin, dás Politiijaid sihkarvuođabálvalusas, Olgoriikadirektoráhtas (UDI), Suonjarsuodjalusas ja atomasihkarvuođadirektoráhtas (DSA), ja Našunála sihkarvuođaeiseválddis (NSM).
– Sihkarvuođadili ja áittadili árvvoštallan min bealis lea dábálaš dásis, eatge mii leat dál eanet áitojuvvon dahje riskkas go dábálaččat. Suodjalus čuovvu dili rivttes bures.
Gearggusvuohta atomgahčahusaid dáfus
Ukrainas leat doaibmi atomfápmorusttegat, ja lea áibbas lunddolaš fuolastuvvat rádioaktiivvalaš ávdnasiin jus atomfápmorusttegat biliduvvojit soahtedoaimmain. Mátta-Ukrainas Zaporizhzhia guovllus atomafápmorusttega lahka leamaš soahtedoaimmat, muhto reaktor ii leat billašuvvan iige guovllus leat registrerejuvvon eahpedábálaš suonjardeapmi. Dálkedilli bearjadaga njukčamánu 4. beaivvi lei dakkáraš ahte nuoskkideapmi ii guoskka Norgii boahttevaš 48 tiimmu.
– DSA čuovvu dárkilit dili. DSA árvvoštallá maid Ukraina ja Norgga gaskka dan muttos guhkkin ahte midjiide jáhkkimis lea dárbbašmeahttun borrat juddatableahtaid, vaikko vel Ukrainas gárttašii nuoskkideapmi, čállá Kárášjoga gielda.
Gánnáha vurkkodit juddatableahtaid
Gielddas lea juddatableahttagearggusvuođavuorká, ja juddatableahtaid gánneha ruovttus vurkkodit.
– Lea uhca vejolašvuohta ahte atomlihkohisvuohta čuohcá Kárášjohkii, muhto sáhttá čuohcat, ja dat váikkuhivččii sakka. Juddatableahtat suodjalit borasdávdda vuostá jus daid borrá doarvái árrat. Gielddas lea juddatableahttavuorká, ja plánas lea juohkit daid jus šattaš dárbu, čállá gieldda. Lassin ávžžuhit Suonjarsuodjalus ja atomasihkarvuođadirektoráhtta (DSA) buot vuollel 40-jahkásaččaid vurkkodit juddatableahtaid ruovttus.
– Juddatableahtaid borat dušše dalle go oaččut dieđu eiseválddiin. Mii dieđihat go dat šattaš áigeguovdil.
Loga eambbo juddatableahtaid birra dsa.no neahttabáikkis.
Atnet fuola guhtet guimmiineattet ja muđui ovttaskas olbmuin
– Min ássiid gaskkas leat guktuid riikkaid olbmot geat leat konflivttas. Ovttaskas olbmuid muitit lea dehálaš, beroškeahttá našuvnnalaš gullevašvuođas, go sii eai leat ovddasvásttolaččat soahtedoaimmaide. Atnet fuola guhtet guimmiideattetguin ja lehket árvasat. Soahti Ukrainas sáhttá guoskat olu olbmuide iešguđet vuohkái ja soaitá muhtimiin reaktiveret soahtetraumaid. Olusat leat váiban, váivvis ja maiddái psyhkalaš váttisvuođat ja gillámušat guovtti jagi koronain. Dálá dáhpáhusat vedjet vuorjašuhttit ja ráfehuhttit, čállá Kárášjoga gielda.
