Meteorologalaš instituhta dálkemihtidanstašuvdna Kárášjogas lea dál doaibman 140 jagi, ja dan oktavuođas lágiduvvo čájáhus dálkemihtidanstašuvnna birra.
Meteorologalaš instituhta dálkemihtidanstašuvdna Kárášjogas lea dál doaibman 140 jagi, ja dan oktavuođas lágiduvvo čájáhus dálkemihtidanstašuvnna birra.
RDM-Sámiid Vuorká-Dávvirat Kárášjogas ja Meteorologalaš instituhtta Oslos leat ovttas ráhkadan čájáhusa dálkemihtidanstašuvnna birra Kárášjogas mii lea 140 jagi dán jagi, «Dálkemihtidanstašuvdna 97251 Karasjok – Márkannjárga, 140 jagi».
Ovdanbuktet ollu dieđuid
Čájáhusa bokte ovdanbuktit dálkemihtidanstašuvnna historjjá ja geat iešguđet dálkemihtideaddjit leat leamašan, čájehat maiddái mihtidanreaidduid, govaid ja teavsttaid. Dálkkádatrievdamat Kárášjogas 1876 rájes dáláža rádjái leat sárgojuvvon plakáhtaide mat čájehit dálkkádatrievdama mihtidemiid badjel 140 jagi áigodagas. Mihtideamit čájehit maiddái makkár dálkkiid mii sáhttit vuordit boahtteáiggis.
Sárgosiin sáhttit lohkat daid buollašeamos ja báhkkaseamos temperatuvrraid, eanemus njuoskkádaga ja goikáseamos áigodaga.
Lea ráhkaduvvon sierra lista makkár sámi mearkabeaivvit mis leat dálkki dáfus ja makkár einnostusat leat leamaš daidda iešguđetge mearkabeivviide. Dasa lassin lea ráhkaduvvon čilgehus das makkár dálkkit duođaid leat leamaš mearkabeivviin einnostusaid ektui.
Geahččit besset ieža geahččalit Meteorologalaš instituhta oahppoprográmma «Stoaga dálkkiin» dárogillii.
Čájáhusa rahpá Kárášjoga sátnejođiheaddji Svein Atle Somby maŋŋebárgga golggotmánu 25. beaivvi, dii. 18.00 Sámiid Vuorká-Dávviriin. Čájáhus lea musea oassi Kárášjoga gieldda 150-jagi ávvudeamis.
Dehálaš dálkemihtidanstašuvdna
Meteorologalaš Instituhta bealis bohtet guokte ságastalli čájáhusa rahpamii. Soai leaba dálkkádatdutki Øyvind Nordli, gii muitala stašuvnna dehálašvuođa dálkkádaga ektui, ja maid dát mihtideamit sáhttet muitalit dálkkádatovdáneami birra dán guovllus.
Dovddus TV-meteorologa John Smits fas muitala «Dálkedieđut mearkasoappis otná yr dálkediehtofálaldahkii – ja dálkemihtidanstašuvnnaid geavaheapmi».
Kárášjoga dálkemihtidanstašuvdna lea okta Meteorologalaš instituhta deháleamos dálkemihtidanstašuvnnain, mas leat mihtidandieđut ruovttoluotta gitta 1876 rádjái, ja lea maiddái dehálaš danin go dát stašuvdna lea nu davvin.
Dán stašuvnnas lea mihtiduvvon buollašeamos temperatuvra Norggas, -51,4 gráda, ja dat lea mihtiduvvon ođđajagemánu 1. beaivvi 1886:s. Dát buollašeamos olahus measta rievdaduvvui ođđajagemánus 1999:s, go grádamihttu čájehii -51,2 gráda, ja dán ge vuoru mihtiduvvui dan seamma dálkemihtidanstašuvnnas.
Finnmárkku duoddara dálá dálkemihtideaddjit bovdejuvvojit čájáhusrahpamii, dieđihit lágideaddjit.
Čájáhusáigodat lea golggotmánu 25. beaivvi rájes gitta juovlamánu 29. beaivái 2016.
