Kárášjoga ovdagoddi lea cuoŋománu 14. beaivvi mearridan joatkit báikkálaš errennjuolggadusaid Covid-19 oktavuođas.
– Ájihan ja heađuštan dihte Covid-19 leavvama ja váikkuhan dihte doalahit dárbbašlaš dearvvasvuođa- ja fuolahusbálvalusaid de lea Kárášjoga ovdagoddi mearridan čuovvovaččat njoammusuodjaluslága § 4-1 vuosttas lađđasa bustáva d vuođul, dieđiha Kárášjoga gielda:
1) Buohkat geat bohtet Kárášjoga gildii go leat mátkkoštan guovlluin čilgejuvvon čuokkis 2 Norggas galget 14 beaivásaš ruovttuerremii go fas máhccet. Álgovuorus 7 beaivvi ja 7 beaivvi vel mearrádusa guhkideami rájis.
2) Mearrádus gusto beaivvis 15.04.20 čuovvovaš guovlluide: Oslo, Agder, Rogalánda, Viken, Vestfolda ja Telemárku, Innlandet, Vestlánda, Trøndelága ja Møre ja Romsdal.3) Mearrádus bistá cuoŋománu 15. beaivvis gitta cuoŋománu 21. Beaivái 2020.
4) Ovdagotti mearrádus lea dahkkojuvvon gielddastivrra mearrádusa olis áššis 20/11 cuoŋománu 8. beaivvi 2020 ja buhtada gielddastivrra mearrádusa seamma beaivvis.
