-Almmuhus-
OĐĐASATKárášjoga vuođđoskuvllas ođđa rektor

Kárášjoga vuođđoskuvllas ođđa rektor

Neahttaredaktevra

-

-

Kárášjoga gielda lea virgádan Jan Gunnar Johansena mánáid- ja nuoraidskuvlla ođđa rektoriin.

Jan Gunnar Johansen (52), guhte lea birrasiid 20 jagi bargan oahpaheaddjin, álgá ođđa virgái borgemánu 1. beaivvi.

– Mun jáhkán dat šaddá buorre álgit. Doppe leat olu buori mielbargit geaiguin leat gergosat dustet daid hástalusaid mat ain bohtet, lohká Johansen ieš Ávvirii.

 

Máŋgii almmuhuvvon

Kárášjoga gielda lea máŋgii almmuhan dán virggi rabasin, ja Jan Gunnar Johansen lea maid máŋgii ohcan dán virgái, ovdal go dál de virgáduvvui. Son dattege ii hálit kommenteret dien proseassa ektui maidege.

– Gielda lea mearridan máŋgii almmuhit dan, ja mus eai leat duođi eanet kommentárat dan ektui, lohká Johansen, guhte illuda ođđa virgái álgit.

Ii Kárášjoga gielddajođiheaddji kultur- ja bajásšaddanossodagas Arnulf Soleng, guhte lea virgádan Johansena, ge kommentere nu olu dan ektui.

– Mun lean aitto beliid álgán dán ámmáhii, nu mus ii lean váldi daid ovddit háviid virgádit geange. Jáhkkimis gielda ohcalii eanet ohcciid virgái, go jo máŋgii almmuhedje virggi, muitala Soleng.

 

– Ođđa hástalusat jagis jahkái

Soleng guhte ieš lea doaibman vuođđoskuvlla rektoriin muitala Johansena dál váldit badjelassii virggi gos deaivida olu hástalusaiguin.

– Dál de váldá dakkár barggu gos biras rievdá johtilit. Eiseválddiid bealis bohtet čađat ođđa hástalusat, dál lea sáhka ahte galgá eanet digitaliseret. Dál lea maid ođđa Stuorradikkedieđáhus almmuhuvvon, gos lea sáhka oahppobirrasa birra. Lea maid hástalus mo givssideami galgá dustet, ja ođđa hástalusat bohtet jagis jahkái maid ferte dustet, čilge Soleng.

 

– Dovdá skuvllabirrasa

Gielddajođiheaddji lea duđavaš virgádemiin.

– Johansen lea guhká bargan skuvllas, sus lea jođiheaddjioahppu ja lea skuvllas bargan sihke luohkájođiheaddjin ja ráđđeaddin. Son lea maid aitto gárven erenoamáš pedagogihka masteroahpu, čilge Soleng ođđa rektora duogáža birra.

Johansen ieš, guhte ii álgge ođđa ámmáhii ovdal borgemánus, ii loga gal iežas vuos nu olu geargan smiehttat ođđa barggu birra.

– Mun in leat geargan vel dien birra smiehttat, in ge leat iskan makkár hástalusat leat vuordimis. Muhto skuvllas hal gal leat dat dábálaš hástalusat, lohká Johansen ja namuha seamma áššiid go Soleng ge.

-Almmuhus-