Dan birra dieđiha Kárášjoga Bargiidbellodat
Dan birra dieđiha Kárášjoga Bargiidbellodat
Kárášjoga Bargiidbellodat, Olgeš bellodat, Sámeálbmot Bellodat (SáB) ja Johttisámiid Listu (JSL) leat šiehtadan bargat ovttas Kárášjoga gielddastivrras 2015-2019 áigodagas.
Sátnejođiheaddjin šaddá Ánddá Niillasa Svein dahje Svein Atle Somby (Bb) ja várresátnejođiheaddjin fas Waldemar Jovnna dahje John Nystad (SáB), dieđihit preassadieđáhusastis.
Sin politihkálaš geađgejuolgi lea:
– Kárášjoga BB, O, SáB ja JSL oktasaš mihttun lea ovddidit Kárášjoga gieldda fátmmasteaddji gieldan gos lea buorre orrut ja bajásšaddat.
– Sámegiella ja kultuvra oktan boazodoaluin lea vuođđun BB, O, SáB ja JSL ovttasbargui.
– Sámegiella ja kultuvra galgá leat nanus ja ealli gieldda ovdánahttimis. Gielda galgá leat rabas dárogielagiidda ja eará gielagiidda, ja maiddái atnit árvvus eará kultuvrraid. Mii áigot ovddidit máŋggakultuvrralaš birrasa, seammás go Kárášjohka lea lunddolaš guovddážin sámi ásahusaid dáfus.
