Kárášjoga ovdagoddi lea bidjan Inger Eline Eriksen Fjellgren vuosttaš kandidáhttan šaddat Kárášjoga ođđa gielddadirektevra.
Ovdagoddi evttohii ovttajienalaččat Inger Eline Eriksen Fjellgrena ođđa gielddadirektevran Kárášjohkii. Eriksen Fjellgren lea borgemánu 15. b. 2021 rájes bargan Deanu gielddadirektevran.
NRK Sápmi dieđiha ahte vaikke ledje ge moadde ohcci virgái, de lea ovdagoddi evttohan dušše Fjellgrena virgái.
– Mis ledje buorit ohccit dán virgái, ja mun lean hui ilus go beassat evttohit Fjellgren ođđa direktevran, lohká Kárášjoga sátnejođiheaddji, Svein Atle Somby, NRK Sápmái.
