Kárášjoga nuorat viidásit Norggagilvvuide

Dán vahkku lei nuoraidfitnodagaid Finnmárkkugilvu Álttás. Dat lea meassu gos joatkkaskuvllaid nuoraidfitnodagat besset čájehit buktagiiddis, ja gilvohallat oallut bálkkašumiid badjel. Dán jagi ledje 43 nuoraidfitnodaga, viđá iešguđet joatkkaskuvllain boahtán čájehit gálvvuid maiguin leat čavčča rájes bargan.

Njuovvanreŋko buvttadan

Kárášjoga nuoraidfitnodat Reŋko UB birgii bures, ja sii fiškaledje máŋga bálkkašumi. Fitnodagas leat oktiibuot 11 oahppi ja sii vázzet Teknihkka ja industriála buvttadeami suorggis. Reŋko UB lea hábmen ja ráhkadan njuovvanreŋkko man sáhttá máhcastit oktii. Njuovvanreŋkui leat vel ráhkadan loktengieđa man ala luoitá goruda, ja lokte reŋkko ala.

Reŋko UB beaivválaš jođiheaddji Nils Samuel Anti muitala ahte jurdda njuovvanreŋkkuin lei ahte reŋkko galgá geahpas fievrredit, ja galgá geahppasit njuovvái.

 — Lei maid ergonomalaš jurdda, njuovvi ii galgga dárbbašit goavrát goruda badjel. Muorra reŋkkot lávejit mieskat, muhto dát reŋko lea dahkkon alumiinnas. Dan lea maid geahpas fievrredit, jus dálveorohahkii maid áigu váldit mielde.

Viidásit Norggameassuide

Nuoraidfitnodagat gilvohalle 19 iešguđet bálkkašumiid badjel, maid iešguđet sajáiduvvon fitnodaga nu go ovdamearkka dihte Statnett ja Ishavskraft geigejedje. Reŋko UB vuittii bálkkašumi buoremus kulturealáhusa ovddas, ja buoremus ođđa buktaga ovddas. Sii bohte nubbin buoremus logo gilvvus, ja goalmmádin buoremus nuoraidfitnodat gilvvus. Dasto besset sii Norggagilvvuide Lillestrøm’ai cuoŋománu 28. ja 29. beaivvi, gosa miehtá Norgga nuoraidfitnodagat čoahkkanit.

Anti lohka sis stuora vuordámušaid go Norggagilvvuide leat beassan.

 — Šaddá somá oaidnit movt doppe manná. Ferte vuordit vuoitit. Dat lei hirbmat somá dohko beassat, go lea min iežamet buvtta.