-Almmuhus-
-Almmuhus-
OĐĐASAT Kárášjoga jahkegirji almmuhuvvo

Kárášjoga jahkegirji almmuhuvvo

-

-

Kárášjoga jahkegirji almmuhuvvo lávvardaga 26. beaivvi skábmamánus Kárášjoga servodatviesus juovlamárkandoaluin. 

SVD Sámiid Vuorká-Dávviriid Musea- ja historjásearvvi stivra ovttasbargá Davvi Girjjiin lágádusaid hábmet ja prentet girjji, ja iešguđet gávppiin vuovdet girjjiid.

Girjji sáhttá sihke Kárášjoga márkanis ja neahtas oastit, ja go tiŋgot jahkegirjelávdegottis njuolga. Sii leat ohcan Kárášjoga gielddas doarjaga go jahkegirji lea dál assábun go ovdal lea leamašan.

 

150 jagi boares govva

Jahkegirjji ovdasiiddu govva čájeha badjel 150 jagi boares gova Kárášjoga dalá ássiin, dalle go Kárášjohka ain gulai Goahgietti gildii.

Máŋggas dáin olbmuin ledje mielde Kárášjoga vuosttaš gielddastivrras 150 jagi dassái.

Dán jagi ávvuda Kárášjohka 150 jagi sierra gieldan.

SVD – Sámiid Vuorká-Dávviriid Musea- ja historjásearvvi jahkegirjelávdegoddi almmuha gieldda gávccát jahkegirjji, mas leat máŋggat ávvudeapmái guoskevaš teavsttat.

 

Oahpásnuvvá máttuide

Girjjis leat muitalusat ja artihkkalat mat dolvot du máŋga buolvva maŋŋelii.

– Lohkki oahpásmuvvá iežas máttuid eallinvuohkái, beaivválaš birgejupmái ja skuvlahistorjái. Dás áddegoađát buorebut mo Kárášjoht-servvodat lea ovdánan, čállet almmuheaddjit preassadieđáhusas.

 

Govain stuora árvu

– Historjjá čohkken lea jahkegirjelávdegotti doaibma ja lea dehálaš ja stuora bargu maid lávdegoddi skeŋke Kárášjoga álbmogii, čállet sii.

Lávdegoddi čohkke eaktodáhtolaččat muitalusaid dáhpáhusain ja fearániin ja olbmuid eallinmuittuid, ja fievrrida daid njálmmálaš hámis čálalaš hápmái.

Govain lea maid stuorra historjjálaš árvu.

Das lea maid govttolaš fálaldat ovddeš jahkegirjjiid oastit. Jahkegirjjit leat juo vuovdimassii iešguđet gávppiin Kárášjoga márkanis, gos lávejit daid vuovdit. Girjjis leat dán jagi 68 siiddu.

-Almmuhus-