Mánnodaga rabai Kárášjoga gielda vel eambbo skuterláhtuid, ja dál leat golbma láhtu rahppon ja golbma leat belohahkii rahppon.
Láhttu 1 lea belohahkii rabas Kárášjoga šalddis Ássebáktái johkaráigge ja Ássebávttis Gárdimii. Láhttu 5 lea rabas Jeagilvármáđii orustansajis čuoiganbartta rádjái. Láhttu 6 lea maid belohahkii rabas Kárášjoga šalddis Niitonjárgii.
Láhtut mat leat ollásit rahppon leat láhttu 3 Ássebávttis Beaivvášgieddái Kárášjoga mielde, láhttu 17 Badjenjárggas gitta Dákteroavvái gos deaivá láhttu 5. Ja láhttu 18 Niitonjárggas Jeagilvármáđii orustansadjái.
– Kárášjoga gielda ávžžuha olbmuid vádjolit várrugasat, čállá gielda ruovttusiiddus.
