2020 bušeahtas leat várren unnán ruđa doaimmahit ja bajásdoallat gieldda geainnuid. Dat mielddisbuktá ahte olu geassedivodeamit unnot.
Kárášjoga gielddas ii leat ruhta oastit bálvalusaid. Dasa gullet dát bálvalusat:
– Deavdit čievrra ja heavvalastit geainnuid.
– Geaidnorenne.
– Oastit duogŋasasfáltta ja čievrra.
Gieldda neahttasiidduin čuožžu ahte gielda lea heajos ruhtadilis, ja geahččalit bargat dan maid sáhttet ja doalahit biddjon bušeahttarámmaid siskkobealde. Gielda oaivvilda ain ahte sáhttá duogŋat asfáltta, nu guhká go lea jo oston asfálta. Gielda sáhttá maid deavdit stuorámus rokkiid čievraluottain tráktoriin ja čađahit goaivunbarggu mii sáhttá dahkkot minigoaivunmašiinnain.
Geaidnočuovga
Geasi mielde sáhttá leat bajándálki mii billista geaidnočuovganeahtas kontaktoraid ja sihkkarusaid. Dat biddjojit eret doaimmahusas. Ruhtadili geažil ii leat Kárášjoga gielddas vejolaš divuhit daid go bušeahtas ii leat gokčon bálvalusoastin 2020:s.
Dát mielddisbuktá ahte sáhttet leat báikkit gielddas gos eai doaimma geaidnočuovggat ovdal 2021.
