– Kárášjoga gielda ferte váldit ovddasvástádusa

– Dál ferte Kárášjoga gielda váldit ovddasvástádusa ja heaitit mohkkáhállamis Utøya-ruđaid geavaheami birra, nu čállá Bargiidbellodaga sámediggejoavku preassadieđáhusas.

– Gielda livččii áigá jo galgat albma ládje šállošit gieldda Utøya-nuoraide ja sin bearrašiidda, dadjá Vibeke Larsen.

– Ain dárbbašit veahki

Bargiidbellodat oaivvilda ahte go gieldda alimus hálddahuslaš jođiheaddji čilge ahte váilevaš prošeaktarehketdoallu lea sivvan dasa go juolluduvvon ruđat eai leat geavahuvvon veahkehit dáid nuoraid, de dat čájeha ahte lea unnán áddejupmi ášši sisdollui.

– Ášši lea dat ahte Kárášjogas leat nuorat ja bearrašat geat dárbbašit veahki maŋŋil Utøya dáhpáhusaid 2011:s. Nuorat ja bearrašat geat eai leat vásihan gieldda doarjjan muhto baicce vuostálastin. Nuorat ja bearraša geat ain dárbbašit gieldda veahki ja doarjaga, čállá Bargiidbellodat.

– Bissehehpet unohis digaštallama

Bellodat oaivvilda ahte gildii orro ain deháleabbo mohkkáhállat Utøya-ruđaid geavaheami dáfus, ovdalii go gullat makkár dárbbut nuorain ja bearrašiin leat. Sii oaivvildit ahte áidna rivttes dahkku livččii leat mieđihit ahte gielda ii leat deavdán iežaset ovddasvástádusa, ja ođđasit álgit kártet dárbbuid ja ásahit fálaldagaid dáidda nuoraide ja bearrašiidda.

– Kárášjoga gielddas lei lihkku go ožžo visot iežaset nuoraid ruoktot Utøya maŋŋil. Állet guođe sin dál. Váldet ovddasvástádusa, heaittihehpet unohis digaštallama ja ásahehpet fálaldagaid, ávžžuha Vibeke Larsen.

Dárkkistanlávdegoddi meannudii ruhtageavaheami 

Kárášjoga gieldda dárkkistanlávdegoddi meannudii ikte dárkkistanlávdegotti guorahallama mo Kárášjoga gielda lea geavahan juolluduvvon «Utøya-ruđaid», oktiibuot 2,55 miljovnna kruvnna.

Dárkkistanlávdegoddi čájeha dušše badjelaš 400 000 kruvnna geavahuvvon riekta. Dáid miljovnnaid galggai gielda geavahit addit psykososiála fálaldaga dan 12 Kárášjoga nurrii geat ledje Utøyas terrorabeaivvi 22.07.2011.

Maŋŋá čoahkkima čilgii ráđđealmmái Elfrid Boine preassakonferánssas manin lea guokte miljovnna kruvnna erohus gieldda ja dárkkistanlávdegotti raporttas

– Mii leat čurbošan ja leat álggahan barggu buoridit dili. Gieldda hálddahusa raporta ii leat rehketdoallu, muhto mii leat čállán listtu mii čájeha masa ruđat leat geavahuvvon. Lea árvvoštallanlistu. Dárkkistanlávdegoddi ohcala prošeaktarehketdoalu ja dás leat mii čurbošan ja šállošat dan. Mii leat mearridan dás dohko galgá prošeaktarehketdoallu čuovvut buot merkejuvvon ruđaid. Rehketdoallu ii leat fálskejuvvon, muhto soaitá leat nu ahte eat leat vuoruhan riekta ja ahte mis ii dáidde leamaš dat gulahallan mii livččii galgan, lohká ráđđealmmái.

Mannan duorastaga mearridii gielddastivra bidjat guokte miljovnna sierra fondii Utøya nuoraid várás.