-Almmuhus-
OĐĐASATKárášjoga festiválii beliin unniduvvon fylkkasuohkanis doarjja

Kárášjoga festiválii beliin unniduvvon fylkkasuohkanis doarjja

-

-

Finnmárkku fylkka­suohkan lea unnidan beliin doarjaga Kárášjoga Festiválii 2016 rájes. Festiválahoavda ii loga ožžon goassege makkár­ge buori ákka manin unniduvvui.

Kárášjoga festivála lágida juohke jagi beassášfestivála Kárášjogas.

Sii ožžot doarjaga festiválii sihke gielddas, Sámedikkis ja Finnmárkku fylkkagielddas.

Sámediggi lea lasihan doarjaga maŋemus jagiid, muhto Finnmárkku fylkkasuohkan lea bargan nuppeládje.

Sii leat unnidan beliin doarjaga 2016 rájes.

 

Váttis unnán ruđaiguin

Finnmárkku Fylkkasuohkan juolludii 40 000 ruvnno Kárášjoga festiválii 2016:s.

2017:s ja 2018:s unnui dat doarjja beliin, maŋemus guokte jagi leat ožžon 20 000 ruvnno doarjaga Finnmárkku fylkkasuohkanis. 

Kárášjoga festivála hoavda, Kenneth Eliassen, lohká ahte lea váttis lágidit festivála unnán ruđaiguin.

– 20 000 ruvnno unnit doarjja váikkuha olu, go dainna lassi ruđain mun vieččašin buoret artisttaid. Diekkár ruhtasupmi váikkuha midjiide olu, lohká son.

 


Kárášjogafestivála hoavda, Kenneth Eliassen (unnagovaš) muitala ahte festivála lea nu márginála ahte 20 000 ruvdnu mearkkašivčči olu sidjiide. priváhtagovva

Birgehallat

Eliassen muitala ahte sus eai leat vel visot logut sajis dán jagáš festiválas, muhto ballá dat ihtet rukses logut, go rehketdoallu lea gárvvis.

– Jus bures manná, de mis báhcá veahá ruhta, dalle eat goit báze vealggás oktiige. Jus hejot manná, de soaitá veahá báhcit vealgi mis, muitala son.

 

Arvat eanet

Ávvir lea buohtastahttán eará festiválaiguin Finnmárkkus, ja maid eará sámi festiválaiguin Romssas.

Logut čájehit ahte Romssas doarju fylkkasuohkan arvat eanet sámi festiválaide go maid Finnmárkku fylkkasuohkan dahká.

Ovdamearkkadihte de oažžu Riddu Riđđu badjel 500 000 ruvnnu Romssa fylkkasuohkanis.

Márkomeannu oažžu fas 100 000 ruvnnu.

Sámi vahku Romssas oažžu maid 80 000 ruvnnu Romssa fylkkasuohkanis doarjaga.

Jus buohtastahttá eará festiválaiguin Finnmárkkus, de oažžu Barents Spetakel Girkonjárggas 180 000 ruvnnu dán jagi, Varangerfestivalen 140 000 ruvnnu.

Vel Kultuvrabeaivi Gáŋgaviikkas ožžot 30 000 ruvnnu lágidit eaktodáhtolaš­kultur­doaluid.

 

– Go oainnát man olu Romssa sámi festiválat ožžot doarjaga. Doaivvut go šaddat buoret jus Finnmárku ja Romsa ovttastahttojit?

– Dan birra lea mus beare unnán diehtu, ahte sáhttit dan árvvoštallat, lohká son.

 

Ávvir  ii lihkostuvvan oažžut Finnmárkku fylkkagielddas kommentára.

-Almmuhus-