Juvddálaččain leat maid ofelaččat geat galget johtit ja muitalit iežaset birra. Dál leat oahppame Sámi ofelaččain movt sii barget.
Juvddálaččain leat maid ofelaččat geat galget johtit ja muitalit iežaset birra. Dál leat oahppame Sámi ofelaččain movt sii barget.
Sámi Allaskuvlla lágidan ofelaš-ortnet lea juo bistán 11 jagi. Moadde nuora leat jagi hávális johtán miehtá Norgga, skuvllain ja eará báikkiin juohkime eará nuoraide dieđuid sápmelaččaid birra. Prošeavtta ruhtada Gieldda ja ođasmahttindepartemeanta. Dál leat álggahan maiddái juvddálaččaide Ofelaš- ortnega. Odne ja ihttin leat sii guossin Guovdageainnus Sámi ofelaččaid luhtte, oahppame movt sii barget.
Identitehta jurdagat
Ofelaččaid jođiheaddji Risten Ravna Länsman lohká sihke diimmáš ja ođđa ofelaččaid deaivvadeame juvddálaš nuoraiguin.
– Lea somá gullat movt sámi ja juvddálaš nuorat smihttet identitehta birra, gullat movt dat lea go olbmos lea juoga lassin vel dasa go lea norgalaš, movt lea dovdat vehá earáláganin Norggas. Lea somá gullat ahte nuppiin lea sullii seamma ládje go mis.
Riggodahkan
Norggas lea birrasiid 1300 juvddálačča, ja leat okta dan viđa našuvnnalaš minoritehtas Norggas main lea guhkit áiggi gullevašvuohta Norgii.
– Mii leat dieđusge eanebut ja mii leat eamiálbmot, muhto lea riggodahkan go sámi ofelaččat besset singuin hupmat identitehta ja persovnnalaš vásáhusaid birra dán doaimmas. Šaddá miellagiddevaš čuovvut nubbi nuppi ja eandalii gullat movt sii muitalit iežaset identitehta birra, dadjá Länsman.
