Eurohpá parlameantta lahttu Sirpa Pietikäinen čállá Vierasblog-čállosis ahte sámiid rievttit dárbbašit buoret suoji go dálá dilis lea.
– Sápmelaččaid rievttit dárbbašit buoret dorvvasteami go dálá dilis leat, čállá Pietikäinen, Yle Sápmi dieđiha.
Čállá sápmelaččaid birra
Pietikäinen namuha maiddái Suoma sápmelaččaid sajádaga čállosisttis.
– Sápmelaččat leat Eurohpá áidna eamiálbmot. Danin lea erenomáš go EU:s váilu čielga politihkka sápmelaččaid vuoigatvuođaid sihkkarastimii. Eamiálbmogiid sajádat oidno dušše EU gávpe- ja ovddidanovttasbargguin, son čállá.
Son váillaha EU:s nannosut mekanisma mo eamiálbmogiid guldalit ja veahkehit ja das mo Davviriikkat galggašedje ovttasbargat.
– Jus Suopma doarju eamiálbmogiid de ferte ILO–169 vuolláičállit
Sirpa Pietikäinen deattuha čállosisttis maiddái skuvlejumi dehálašvuođa. Son oaivvilda, ahte skuvlejumi vuoruheapmi sihkkarastá maiddái sámegielat bálvalusaid.
– Mii loktet Eurohpá parlameantta oainnus erenomážit eamiálbmogiid rievtti oažžut skuvlejumi iežaset gillii nu guhká go fal lea vejolaš. Dat ovddida maid ahte sámegielhálliide gávdnojit sámegielat bálvalusat, čállá son.
– Dáin soahpamušain nummir 169 guoská eamiálbmogiid rivttiid. Davviriikkain dušše Norga ja Dánmárku leat dan vuolláičállán. Jus Suopma háliida doarjut eamiálbmogiid – nu go sápmelaččaid áššiid, dan eaktun lea soahpamuša vuolláičállin, čállá Pietikäinen.